Otmar Oduber di PPA ta cuestiona kico e gobierno aki ta para p’e: Placa of Principio: Materialismo of Idealismo?

Den e entrevista cu lider di fraccion di PPA, Otmar Oduber a indica, cu recientemente por a wak cu Minister di Economia y Finansas a bolbe menciona cu e ‘voortgangsrapportage’ ta mustra cu nos economia ta bayendo hopi bon. Pero kico e bon cifanan aki por nifica? Di berdad kier tapa e riesgo di nos autonomia cu cifra bunita? Pa Parlamentario Oduber, esaki ta un muestra cla, cu realmente nos por atende nos finansas, si nos ta disciplina.

Begrotingskamer ta necesario!

Pa Otmar Oduber, como lider di PPA, tabata importante p’e pone enfasis, cu aunke e porcentahen pa e normanan a casi dobla den loke tabata stipula den e acuerdo, e mensahe ta simpel: nos mester tin disciplina! PPA lo keda insisti pa bin cu e ‘begrotingskamer’, pero esaki mester ta bon ancra den nos constitucion, unda cu mester di dos tercera parti di mayoria pa haci cambio den e normanan. “Pero e decision aki, bo no por hinca den di Den Haag, den un conseho di Minister, caminda 11 minister lo vota contra of pro, sin conoce e realidad di Aruba, unda nos ta depende asina hopi di nos turismo y di mercado Mericano. Pero atrobe bo ta wak claramente, cu no tin niun interes di e dos fraccionnan cu ta sostene gobierno, pa papia riba  e tema aki”, Otmar a expresa.

Parlamento Den Sombra di Den Haag

Gobierno ta bisa cu na final, comunidad di Aruba lo mira kico cada fraccion ta para p’e, ora e tema yega Parlamento. “Pero loke mi a mira awe atrobe, sinta cu e Hulandesnan na mesa, caminda e propio staatssecretaris a conta di su lucha pa haya bo oido na Den Haag, como representante di su pueblo na Groningen, mester ta un señal crucial pa Aruba. Imagina bo, un propio Hulandes na Groningen, no ta haya oido na Den Haag, corda nos cu ta 11 ora leu y den Caribe? Con nos ta bay verwacht cu na Den Haag nan ta bay scucha nos? Nos a pidie pa porfabor hiba e mensahe aki pa Gobierno di Aruba y pa Gobierno di Aruba ta mas transparente cu e pueblo aki tambe”, Otmar a subraya. E discusion aki no ta trata solamente porcentahe di interes, ta trata nos dignidad y derecho di tuma decision den nos mes cas.

Principio no tin prijs

“No ta trata cu nos kier reduci interes di 6.9% pa 3.5%, djis pa haya placa. Ta un cuestion di dignidad, integridad y orguyo di loke nos tin y hasta nos ta den esaki den propio Himno, corda esey bon! P’esey nos por tin autodeterminacion, unda nos por tuma e decisionnan aki na Aruba”, Otmar a sigui elabora. Pues nos mes por maneha nos futuro, sin tin mester di tin un man extendi di otro gobierno. Ta bon pa recorda, cu e herencia di autodeterminacion aki, ta danki na un lucha, cu a cuminsa den e añanan 1940, unda finalmente a termina na 1985 y a permiti nos drenta 1986 cu nos Status Aparte, pero a consolida na 1995, ora cu a scrap nos independencia. “Mi ta spera cu niun hende lubida esaki durante e discusionnan di awor, djis pa via di placa. Tin un dicho grandi cu libertador Betico Croes a uza: ‘Materialismo nunca por vence idealismo’ y mi ta spera cu esunnan cu tabata carga e antorcha di idealismo aki, cu tambe a papia di; ‘baas den mes cas’, corda esaki awe na 2025,” segun Otmar Oduber. 

Pa conclui ta importante pa tur ciudadano cu ta stima y honra nos luchadornan di antes, cu e pregunta simpel, pero profundo: Aruba lo eligi placa of principio? Un pueblo cu a lucha pa su autonomia, no por entrega su bos y autodeterminacion den man di 11 minister den Den Haag. E discusion aki mester ta duidelijk:: no ta solamente cuanto placa nos por saca, sino ken ta manda riba nos destino. “Y esey, pueblo di Aruba, ta un decision cu mester tuma awe, no ora bira demasiado laat,” Otmar a finalisa bisando.