Parlamentario Sevinger: Cu transparencia y responsabilidad ta mustra resultado tras bishita na Merca

ORANJESTAD (27 di mei 2025) – Durante un rueda di prensa tocante e reciente bishita oficial di un delegacion parlamentario na Washington D.C., honorabel miembro di Parlamento Stephany Sevinger a pone enfasis riba e necesidad di transparencia y claridad den loke ta e trabou di un parlamentario, con ta hustifica e gasto di fondo publico y e desaroyonan mas reciente den e relacionnan strategico cu Merca na bienestar di Aruba.

“Mi kier habri e rueda di prensa aki papiando tocante transparencia,” segun Sevinger. “Mi a tuma nota cu hopi articulo a sali e siman aki riba nos biahenan, specialmente e di Comision di Relacion Norte Americano. Nos ta un Parlamento nobo, un Parlamento cu ta kere den transparencia, y nos ta kere cu pueblo mester sa unda ta inverti – tanto den nos como Parlamentarionan, como den nos partido.” E comision ariba menciona ta uno cu apenas a crea ocho aña pasa.

Sevinger a duna claridad riba e contenido di e bishita: e delegacion a keda 6 dia na Washington D.C., bao coordinacion di e Minister Plenipotenciario Zulema Dabian, kende a prepara un programa completo cu reunionnan durante henter dia. Den e prome dia a topa cu representante di e Departamento di Homeland Security, unda a discuti e tema e crucial di pre clearance. “Aruba ta un di solamente 6 pais cu tin pre clearance pa border control pa Merca – esaki ta un posicion strategico pa nos isla,” segun Sevinger.

E parlamentario ta destaca cu e relacion cu Merca ta fundamental pa Aruba. “Cerca di 60% di nos comercio ta cu Merca, 80% di nos turista ta bini for di Merca, y nos cultura turistico ta basa fuertemente riba influencia Mericano. Esaki ta mustra cu Merca no ta simplemente un pais ‘aliado’, pero un partner clave den desaroyo y sostenibilidad di Aruba.”

Ademas di turismo y comercio, e delegacion a toca tambe topiconan relaciona cu educacion y cultura. “Nos tin mas di 100 studiante Arubiano ta studia actualmente na Merca. E lasonan educativo y cultural cu Merca ta habri porta pa oportunidad pa nos hubentud y ta fortifica nos posicion den e Caribe,” segun Sevinger.

“Dus den manera general mi por bisa cu mi lo kier duna pueblo di Aruba por escrito un rapport completo di kico nos a haci y kico e biahe aki ta significa. Nos a mira cu Aruba ta un isla, nos ta isola, nos ta chikito, nos ta forma parti di Reino Hulandes berdad cual ta un gran apoyo, pero con cu bay bin, relacionnan internacional ta hopi importante pa desaroya nos pais na e nivel cu nos kier wak e yega algun dia,” e parlamentario a declara.

Tambe a haci un yamada pa mantene transparencia continuo: “Cabando kinan mi kier bisa cu tin hopi cos ainda cu nos por sigui traha riba dje. Mi lo sigui informa e pueblo cada bes cu tin un biahe. Nos portanan ta habri pa cualke pregunta, pasobra transparencia ta algo cu nos ta para pe, y nos lo sigui duna pueblo cuenta di kico nos ta haci ora nos sali fo’i Aruba.”

Parlamentario Sevinger ta confirma su compromiso pa sigui traha den claridad, transparencia y respet pa e pueblo Arubano. “E pueblo tin derecho pa sa loke nos ta haci, y nos lo sigui comparti loke nos ta logra, den nomber di e pueblo cu nos ta sirbi.”