Wings of Hope a organisa e di 3 edicion di AUA Airport Runway Run 2025
Aportando na un comunidad mas saludabel
Oranjestad: Recientemente e team di Wings of Hope (WoH) di Aruba Airport Authority N.V. (AAA) a organisa e di 3 AUA Airport Runway Run riba diadomingo 18 di mei 2025, caminda un total di 150 coredo tabatin e oportunidad di experencia un evento unico mientras ta duna bek na comunidad.
Den presencia di Minister di Turismo, Transporte y Labor, mr. Wendrick Cicilia, tur coredo y bountario e team di AAA Wings of Hope simbolicamente a haci entrega di un bunita donacion di 10.000,00 florin cada un na 2 fundacion entre otro Fundacion Autismo Aruba (FAA) y Ban Uni Man Pa Cria Nos Muchanan.
Minister di Turismo, Transporte y Labor, mr. Wendrick Cicilia, FAA y Ban Uni Man Pa Cria Nos Muchanan tabata presente pa e start call oficial di e di 3 AUA Airport Runway Run. Tur 150 coredo a core un poco mas di 5KM cuminsando for di Runway 11 pa Runway 29 y bek rumbo Runway 11 pa yega na e meta. E coredonan por a presencia un salida di solo magnifico durante nan careda. Pa termina e evento, a yama tur coredo bonbini na e punto di encuentro cu batido traha fresco y fruta. A rifa un total di 20 premio entre e participantenan y tur premio tabata relaciona cu salud y bienestar.
Demostrando un promesa pa contrui na un miho mañan, Wings of Hope lo sigui ehecuta proyectonan socialmente responsabel y impactante uzando e Metanan di Desaroyo Sostenibel di Nacionnan Uni como guia. Wings of Hope ta spera di curasha otro companianan y organisacionnan pa tambe sigui duna bek na comunidad pa medio di colaboracion.
AAA y WoH ta inmensamente agradecido pa tur boluntario, coredo, organisacion y otro gruponan di servicio cu a participa na e di 3 AUA Airport Runway Run pa haci esaki uno inolvidabel y exitoso.
