HOH su empleado di luna di april ta Damiris Rengel

Un colega dedica y cu pasion pa su pashentnan

Siman pasa ergoterapista Damiris Rengel mester a bay piso pa atende pashent y durante su ausencia su coleganan a decora y prepara pa dun’e un surprisa grandi.  Asina cu ela yega bek y drenta su area di trabou ela topa cu un sala yena di colega, famia y tambe miembro di Hunta di Directiva Jacco Vroegop cu e grito ‘surprise’. Ora ela tende cu ela sali empleado di luna di april e no por a kere y ela bira basta emocional mirando tur e sosten cu ela haya di su coleganan pe nominacion aki. Un dia cu sigur nunca elo lubida y cu lo keda un motivacion pe pa semper.

Damiris a cuminsa traha na november 2023 y di biaha a demostra di ta un ergoterapista profesional dedica cu ta tuma su trabou hopi na serio. Banda di esaki e ta un tremendo teamplayer. E ta semper dispuesto pa duna extra, e ta proactivo den tuma contacto cu su team y ta duna feedback cu ta promove un colaboracion positivo den e team di rehabilitacion. Damiris su meta personal ta pa hunto mehora e cuido di rehabilitacion na HOH.

Su pashentnan tin hopi bon comentario di dje. E ta reacciona lihe y cu respet na e necesidadnan di su pashentnan y tin un super habilidad di scucha y duna e atencion cu nan merece. 

Sigui normanan halto di calidad ta hopi importante pa Damiris. E ta un colega responsabel y critico di su mesun trabou y tambe ta bin cu sugerencianan na su coleganan pa mehoracion di e departamento manera identifica erornan potencial y con pa preveni esaki. Tur esaki Damiris ta haci di un forma cu coleganan ta sinti nan mes scucha y balora. Su experiencia y conocemento amplio ta aporta hopi na su team. E sa con pa uza su talentonan y pa yega na miho resultado pe departamento y pe pashentnan y constantemente ta busca oportunidad nobo pa desaroya su mes of su team cu trainingnan.

Su dedicacion ta inigualabel. Damiris semper t’ey pa yuda y su compromiso na trabou ta haci cu e ta keda busca pa duna e miho cuido posibel. Nos tur na HOH ta hopi contento y orguyoso cu Damiris ta forma parti di team HOH. Masha pabien Damiris cu e bunita reconocemento aki