Parlamentario Dangui Oduber : Promer minister Eman y minister Wyatt a cambia decision di e lista positivo di remedi.

Nan a ganja tur nos grandinan:
Keto bai pensionadonan ta pagando pa cierto remedinan

Ta hopi fresco den nos memoria con durante mas cu 1 anja largo como tambe durante periodo di campanja tanto promer minister Eman como minister Wyatt Ras a instiga pueblo pa cu e decision di e lista positivo di remedi.
Nan a haci e promesa cu na momento nan drenta gobierno nan lo kita e lista positivo aki pa tur hende y especialmente pa cu nos pensionadonan cu nan NO mester paga pa ningun pero ningun remedi mas.
Tempo nos tawata den gobierno durante e pandemia, un di e condicionan di gobierno di Hulanda tawata cu mester corta 60 miyon florin den cuido medico. Pa e motibo aki dado momento mester a tuma un decision hopi dificil cu mester a kita e lista positivo di remedi.
Na mes momento nos mes a bisa cu ora e situacion financiero di AZV drecha, cual a bira mihor tambe, nos mes lo percura pa pensionadonan NO mester paga mas pa NINGUN remedi mas.
Di e forma aki na December 2024 nos a tuma un decision den conseho di minister pa NO cobra ningun pensionado mas pa ningun remedi pasobra AZV tin actualmente un surplus di mas di 100 miyon florin y no por hustifica mas keda cobra nos pensionadonan pa ningun remedi. Ora e situacion financiero tawata precario tawata dificil pero awor cu tin placa na abundancia no tin hustificacion mas pa keda cobra nos grandinan.
E decision aki mi ta comparti hunto cu e articulo aki pa asina tur hende por lesa e decision aki y wak pa nan mes kiko e decision tawata. Nos a manda e decision aki pa AZV y duna nan e instruccion pa kita e lista positivo pa tur pensionadonan.
A bin cambio di gobierno y nos a spera cu e gobierno AVP sin Futuro lo percura pa e decision aki wordo ehecuta y zorg pa ningun pensionado mas mester paga pa remedinan. Nan kier a bai pronkea cu nos plumanan y nos ta condena y lamenta cu nan a cambia nos decision y di e forma aki perhudica nos grandinan y pone nan keda paga pa cierto remedinan.
Nos a wordo aserca pa masha hopi pensionado expresando nan preocupacion y disgusto pa cu e decision di e gobierno nobo aki.
Nos a tuma nota cu nos decision a wordo cambia pa promer minister Eman y minister Wyatt Ras pasobra keto bai pensionadonan mester PAGA pa varios remedi.
Cu esaki nan a mustra cu nan a dal pensionadonan un cara abou, nan a ganjanan, nan a malinformanan , manipulanan y tuma tur pensionado haci un biaha mas.
Nan a instiga, nan a crea rabia y odio, nan a priminti cu pensionadonan NO mester paga mas pa remedinan y awe nan a cambia nos decision pa toch sigui cobra pensionadonan pa cierto remedinan. Pueblo ta exigi pa bin cambio di inmediato den e decision aki.
Ta hopi tristo y bergonzoso con e hendenan aki a tuma tur hende haci y awe keto bai pensionadanan ta wordo afecta pa e decision nobo di sr Eman y sra Wyatt Ras.