Don Ceder di Tweede Kamer: E Gobierno nobo di Aruba tin ambicion nobo
Dialuna 5 di mei, un delegacion di Vaste Commissie di Tweede Kamer di Relacionnan di Reino, tabata di bishita cerca Prome Minister Mike Eman y Minister di Relacionnan di Reino Gerlien Croes. E delegacion a consisti di Raoul White di Groen Links-PVdA, Aukje de Vries di VVD, Mpanzu Bamenga di D66, Don Ceder di ChristenUnie.
Don Ceder di e Comision Permanente di Tweede Kamer, a keda satisfecho cu e reunion cu e Ministernan di Aruba, den cual a papia abiertamente tocante e desaroyo di e relacionnan entre Aruba y Hulanda. E reunion aki a duna e delegacion e oportunidad pa dialoga riba hopi temanan importante, incluyendo educacion, finansa, fortalece e laso di cooperacion entre Aruba y Hulanda, y e vision pa futuro.
Don Ceder a comenta cu e Vaste Commissie di Tweede Kamer ta contento cu e gobierno nobo tin ambicionnan nobo y ta cla pa traha hunto cu Hulanda. Como comision permanente den Tweede Kamer, nan ta wak e renobacion aki cu speransa y ta kere cu e sinergia nobo lo trece beneficio pa tur partner den Reino.
Segun Ceder, nan ta compromete pa traha man den man cu Aruba riba hopi tema, caminda tanto Aruba como Hulanda por sali beneficia. E manera cu Aruba ta busca mas acercamento cu Hulanda, ta algo cu nos ta stimula y sostene, ya cu un Reino fuerte ta un beneficio pa tur.
Lo sigui evalua e temanan clave, y como parlamento nan tin un rol di control y evaluacion, pero semper den un ambito di colaboracion. Ceder a finalisa deseando e gobierno nobo di Aruba exito y sabiduria den nan tareanan pa eleva Aruba na e siguiente nivel.
