Parlamentario Evelyn Wever-Croes : MINISTER DI ECONOMIA Y FINANSAS NO TIN UN PLAN CONCRETO DEN CASO DI UN CALAMIDAD

ORANJESTAD – Durante un reunion den Parlamento cu Minister di Economia y Finasas Geoffrey Wever riba e situacion na unda cu gobierno Mericano a anuncia e aumento den e tarifa di importacion Parlamentario Evelyn Wever-Croes a elabora riba e punto cu e Minister a trece dilanti bisando cu comunidad no mester tin panico y cu nos mester tin control. Esaki sigur ta un punto hopi importante y pa e motibo aki, Parlamento a bin ta yama e reunion aki desde basta simannan pasa.

Parlamentario Wever-Croes a expresa cu pa bo evita panico, bo mester tin lidersago fuerte y firme, manera e gobierno anterior tabata tin durante covid. Tambe el a indica cu e minister a menciona cu apenas e gobierno tin 4 siman, pero e ta lubida cu e gobierno a wordo forma dor di dos partido cu a tuma 4 luna pa forma pa motibo di discusionnan personal. E gobierno aki mester cuminsa mustra liderasgo, y no bin pidi pa pueblo keda trankil y no bay den panico, mientras nan no ta carga nan responsabilidad como mandatario di e pais aki.

Riba 2 di April President Trump a anuncia e aumento riba e tarifanan di importacion y cu esaki Aruba, Sint Maarten y Corsou lo wordo afecta cu un derecho di importacion di 10%. Parlamentario Wever-Croes a inidca cu e aumento aki lo no tin un impacto directo pero si indirecto y ta importante pa Parlamento sa exactamente kico e impacto aki ta. Contrario di Aruba, Corsou si a trece esakinan dilanti cual ta mustra hopi falta di lidersago mirando cu Aruba ta e isla cu semper tabata bon prepara.

Tin 4 area di preocupacion

Aumento di tarifa ta crea inflacion

Aruba ta importa hopi producto di Merca y esakinan lo bira mas caro pa nos consumidor paso nos ta importando e inflacion

Recesion mundial

IMF ta papiando caba di un recesion mundial, y esaki lo afecta turismo cu ta Aruba su pilar económico

Rebaho den GDP

Otro punto cu IMF a trece dilanti ta e rebaho den GDP mundialmente. Esaki sigur ta negativo pa pais Aruba mirando cu e lo stroba nos pa cumpli cu nos noramanan financiero  cu ta acopla na e GDP.

Forsa di dollar ta den peliger

Otro preocupacion ta si inversionistanan cuminsa saca nan placa  di Merca, e forsa di e dollar lo wordo afecta y cu esaki, Aruba cu tin e florin acopla na e dollar, esaki lo afecta nos florin.

Parlamentario Wever-Croes a indica cu e analistanan ya ta teneindo cuenta cu tur e scenarionan. Loke Parlamento  y Aruba kier sa ta con e situacion aki ta baya afecta nos, pero principalmente kico ta locual cu pais Aruba ta bay haci pa evita of mitiga e situacion aki lo mas tanto posibel.