Pronto Semeleerstraat lo tin su scol di musica ‘E Porta pa Harmonia’

Diahuebs, den ora di merdia, Prome Minister di pais Aruba mr. Mike Eman a bishita Semeleerstraat na Noord pa inspecciona e progreso y remodelacion tumando luga pa locual ta trata “E Porta pa Harmonia”.

Durante di e prome Accion di Bario, Prome Minister Eman hunto cu diferente instacia/departamento a bin hunto pa duna e bario di Semeleerstraat e atencion necesario, despues cu e Gobierno anterior a neglisha practicamente tur bario rond di Aruba.

Diahuebs merdia, e prome mandatario a bishita e proyecto den Semeleerstraat cu lo bira e scol di musica “E Porta di Harmonia”, pa e follow up y mira con e trabaonan ta avansando.

Premier Eman ta contento di mira e progreso, ta anticipa cu den aproximadamente dos pa tres siman lo finalisa cu e proyecto cu lo bira un scol di musica den e curason di e bario di Noord y accesibel pa henter e bario.

Tin un interes grandi, y vision y planificacion di Gabinete AVP-Futuro ta pa mehora e  calidad di bida den cada skina di nos pais, mas aun den areanan cu tin mas reto y necesidad. Prome Minister Eman a gradici FCCA como tambe e contratista pa ehecucion di e proyecto.

Intencion ta pa logra den e cuarenticinco barionan di FCCA, pa mira e recuperacion for di e abandono y deterioro cu a tuma luga pa tanto aña. E presencia y atencion di gobierno ta hustamente pa reactiva e barionan y encurasha e habitantenan pa transforma nan bario den un bario feliz y harmonioso pa biba.

Ademas di esey, pronto lo mira proyectonan di renobacion den un scala mas grandi tuma luga, manera entre otro den e bario di Bushiri, De Vuyst, MFA San Nicolas como tambe e proyecto di revitalisacion di Bernhardstraat.

Prome Minister Eman tambe ta consciente cu di parti oposicion tin critica riba e accionnan tumando luga den bario. E ta logico mirando cu pa casi ocho aña e abandono ta bisto den mayoria di bario. Ta un tristesa enorme pa mira e barionan social den tanto deterioro.