Gabinete AVP-Futuro ta trece solucion pa e bario di Mabon Complex

Atencion na e necesidad di e comunidad ta algo cu Gabinete AVP-Futuro tin ancra den
nan acuerdo di gobernacion. Durante accion di limpiesa na Mabon Complex, e
habitantenan a acerca Prome Minister mr. Mike Eman cu nan preocupacionnan pero
tambe ta propone posibel solucionnan pa e retonan cu nan ta enfrenta den nan bario.
No mucho siman pasa, durante accion di bario, Sharisa Ras, habitante di Mabon
Complex, a vocifera su preocupacion riba un pasada cu tin masha tempo descuida. E
tabatin un peticion na Prome Minister Eman, si tabata posibel cu por haci un limpiesa
pero tambe un adaptacion na e area aki pa asina e por bira accesibel, den un forma
mas sigur, na e habitantenan cu ta haci uzo di e pasada aki.
Hopi ta esnan cu ta tuma e ruta aki, via e pasada, pa yega na e parada di bus of un
caminda mas cortico pa yega cas. Tin algun cu den ora di marduga ta uza e pasada,
cual ta scur, hopi inclina y ta crea un peliger pa e usuarionan mes. Ademas no por uza
e pasada aki na momento di yobido, como cu e ta slip y ta insigur pa mayoria habitante
di e area. Asina mes hopi ta riesga pasando riba e pasada aki, pa evita di bay pasa full
rond.
Prome Minister Eman a acerca e departamento concerni, cual ta DOW, pa asina hunto
yega na un solucion pa e incomodidad diario cu e habitantenan ta pasa aden. Mesora
nan a presenta y brinda un opcion pa soluciona e pasada den Mabon Complex.
A opta pa un trapi, traha di palo duradero, hancho den forma di plataforma. Habitante
tambe a sugeri algo cu por tin step nan hancho y largo pa esnan di mas edad por baha
sin dificultad. E idea nan a tume cu man habri.
Pa locual ta iluminacion, esaki tambe ta peticion cu a haya oido y pronto e pasada di
Mabon Complex lo haya un bista nobo y teniendo na cuenta e necesidad di su
habitantenan.