Paradise Strength Aruba & BFN CrossFit ta organisa: Weightlifting Throwdown

Diasabra awo, dia 8 di juli, CrossFit Box “BFN CrossFit” ta uni forsa cu club di lantamento di peso den tur capacidad, “Paradise Strength Aruba” y ta organisa un evento di Olympic Weightlifting; “Weightlifting Throwndown”. E evento aki lo tin e deporte Olimpico di lantamento di peso (Weightlifting) den accion, pero cu un set di regla mas flexibel y facil, unda cu ta done un tempo limita pa hasi un mihor score, enbes di tin solamente 3 turno pa hasi esaki den cada disciplina.

E evento aki, anteriormente organisa door di Paradise Strength Aruba, lo conoce dos tempo di competencia, unda cada atleta lo tin 15 minuut pa establece un maximo den e prome disciplina cu ta “Snatch” y despues di un break di 5 minuut, unabes mas lo tin 15 minuut pa establece un maximo den e di dos disciplina cu ta “Clean&Jerk”. Lo hasi uzo di e reglanan di CrossFit, pa asina e ta mas accesibel pa tur y un bon oportunidad pa prinicipiante y esnan interesa den e deporte por participa. A base di e total combina di peso hisa, y e peso corporal di cada atleta, lo saca un score final usando e calculo “Sinclair Coefficient”, pa asina saca un suma como final score. Esaki ta hasie un competencia unda tur persona ta competi contra otro den e mesun division.

Aworaki ta conta cu participacion di mas di 26 atleta di diferente Gym/CrossFit box, entre otro, BFN CrossFit, Paradise Strength Aruba, E2REP Fitness, Muscles&Lungs y otro nan mas. E evento lo cuminsa 10or di mainta, y cada heat lo dura rond di 45 minuut, unda ta spera di tin por lo menos 5 heat di competencia. Evento lo tuma lug ana BFN Gym, situa na L.G. Smith BLDV 152, mihor conoci como edificio di ex-supermercado KONG HING na Oranjestad. (banda di CROWN). Pa cualkier informacion, por jama of whatsapp Jonathan Wever na 5943190