Parlamentario Shailiny Tromp-Lee (MEP): “Gobierno mester sali for di silencio y uza fondonan reserva pa proteha poder di compra di pueblo y atende cu e costo di bida halto”

Durante e reunion publico den Parlamento riba e impactonan di e tensionnan den Medio Oriente, Parlamentario Drs. Shailiny Tromp-Lee a cuestiona e silencio di Gobierno. Tromp-Lee a pidi gobierno pa uza e reserva existente y e fondonan di inversion cu a wordo poni un banda, pa mitiga e subida drastico den costo di bida cu ta afectando e poder di compra di nos hendenan.

Un isla dependiente di e economia mundial

For di dia 3 di maart ultimo, Fraccion di MEP a solicita e reunion aki debi na e preocupacion grandi cu e conflicto entre Merca, Israel y Iran ta causando riba e economia mundial y, consecuentemente, riba Aruba. Segun Tromp-Lee, Aruba ta un isla 100% dependiente di importacion y transporte maritimo, locual ta nifica cu cualkier crisis global ta transforma rapidamente den un crisis local den e cartera di nos pueblo.

“Reaccion sin direccion”

Tromp-Lee a cualifica e maneho di Gobierno te na e momentonan aki como un “reaccion sin direccion”. Mientras cu paisnan den region y rond mundo ya a presenta plannan di contingencia y sosten economico, Aruba a limita su mes na un medida temporal di apenas dos luna pa e prijs di gasoline. “Kico ta e plan despues di e dos lunanan ey? Kico ta e plan si e crisis aki dura un aña?” Tromp-Lee a cuestiona. Pa e Parlamentario, ta inaceptabel cu mientras paisnan rond mundo ta activando nan reservanan y reduciendo impuestonan pa proteha nan ciudadanonan, na Aruba tin un ausencia total di scenario planning y un falta di comunicacion serio cu Parlamento. 

Uzo di surplus y 70 miyon di Investeringsfonds

Un di e puntonan mas fuerte di e intervencion di Tromp-Lee tabata e exigencia pa activa e fondonan cu Gobierno tin un banda poni. “Nos sa cu tin un surplus existente den caha di Gobierno y cu tin un suma significante den e Investeringsfonds. Politicamente, nos mester pone presion pa uza mas tanto posibel for di e 70 miyon florin di inversion ey, na beneficio di nos hendenan” Tromp-Lee a declara. 

Segun Tromp-Lee, e miho inversion cu Aruba por haci awe no ta den beton of proyectonan nobo pa futuro, sino den mitiga e sla cu e famianan mas vulnerabel, nos pensionadonan y e clase media ta ricibi, sin lubida e companianan chikito y medianonan. “Pueblo no por mas y nos no por permiti pa e fondonan ey keda sinta eyden mientras e poder di compra di nos hendenan ta wordo gravemente debilita.” Tomp-Lee a manifesta.





Preguntanan di Urgencia sin contesta

Tromp-Lee a recorda tambe cu dia 30 di maart el a manda 34 pregunta por escrito pa Minister Geoffrey Wever, pero ainda no a ricibi ningun contesta. Esaki a hiba e Parlamentario pa presenta e serie di preguntanan durante e reunion pa Minister por contesta. No ta panico kier crea, kier pa Gobierno ta proactivo y no re-activo. Nos no tin e luho pa reacciona laat. Pueblo di Aruba merece claridad, accion y proteccion, no incertidumbre y silencio,” Tromp-Lee a conclui.