Bishita di Europarlamentario Marit Maij na Aruba ta destaca importancia di cooperacion internacional y futuro colaboracion

Bishita di Europarlamentario Marit Maij na Aruba ta destaca importancia di cooperacion internacional y futuro colaboracion

Den un ambiente di respet mutuo y dialogo constructivo, Prome Minister Mike Eman a ricibi recientemente den su oficina un bishita oficial di e Europarlamentario Marit Maij, kende tabata acompaña pa su asesor politico Kenville Kleinmoedig.

Durante e encuentro, a sostene un combersacion amplio riba e relacion dentro di Reino Hulandes, cu enfasis particular riba e cooperacion entre Aruba y Union Europeo. Segun Maij, e dialogo, percibi como productivo y constructivo, unda a intercambia punto di bista riba con e relacion institucional ta evoluciona y unda tin espacio pa profundisa colaboracion.

Den e contexto aki, a dedica atencion special na e status di Aruba como Pais y Territorio Ultramar (LGO), loke ta habri posibilidad pa acceso na fondo y programa di apoyo Europeo. Maij a referi tambe na e reciente LGO-forum, unda a participa como miembro di Parlamento Europeo, cu enfoke riba oportunidadnan concreto pa cooperacion futuro. Entre e temanan di prioridad cu a surgi ta conectividad, transicion digital y transicion energetico, elemento esencial pa desaroyo sostenible di e islanan.

E Europarlamentario a enfatisa cu, aunke Europa por parse distante geograficamente, e relacion institucional ta di caracter cercano. Den su rol como representante dentro di Reino Hulandes, Maij a expresa cu e ta considera su mes tambe como un bos pa ciudadano di Aruba den Parlamento Europeo, cu e meta pa acerca e institucionnan Europeo mas cerca di e region.

Durante e bishita, a comparti gesto simbolico di apreciacion mutuo. Kleinmoedig a ricibi un pin di banderin di Aruba, mientras cu Maij a ricibi un moneda conmemorativo, reflehando balor historico y identidad nacional di e isla.

E presencia di Kleinmoedig, un nativo di Corsou cu a logra resultado notable den e reciente eleccionnan pa Parlamento Europeo, ta destaca un creciente participacion Caribe den e scenario Europeo. Partido GroenLinks-PvdA a registra un desempeño fuerte den diferente isla den e region. Na Corsou, di 572 voto valido, 179 a bay pa e partido, di cual 87 pa Kleinmoedig. Na Aruba, di 388 votante, 114 a opta pa GroenLinks-PvdA, cu 30 voto pa Kleinmoedig, mientras cu CDA a bira e di dos partido cu 64 voto.

Na Sint Maarten, cu 73 votante, GroenLinks-PvdA y D66 ambos a logra 19 voto. Na Boneiro, unda desde 2010 tin status di municipio special di Hulanda, e partido a domina cu 730 di 1784 voto valido, di cual 553 a bay pa Kleinmoedig, segun informacion comparti pa autoridadnan local.

Gobierno di Aruba ta considera e tipo di encuentro aki como un paso significativo den e fortalecemento di relacionnan internacional, cu enfoke riba interes comun, stabilidad regional y oportunidad pa desaroyo. Bou liderazgo di Prome Minister, e gabinete ta sigui comprometi na promove dialogo habri y cooperacion strategico cu partnernan internacional, semper cu prioridad pa bienestar di pueblo di Aruba y futuro di generacionnan binidero.