Europarlamentario Marit Maij (GroenLinks-PvdA) a haci un bishita di trabou siman pasa na Aruba. Motibo di e bishita tabata e di 21 edicion di e Foro di e Paisnan y Teritorionan Ultramar - Union Europeo (LGO-forum), pero Maij a tuma e iniciativa tambe pa efectua algun bishita, caminda a sostene dialogo cu diferente minister, sindicato, institucionnan educativo y hobennan. Su conclusion ta cla: Arubianonan oficialmente tin derecho Europeo, pero den practica hopi di e derechonan aki ta insuficiente na e isla.

Kico ta pasando concretamente?

Aruba ta un LGO, un Pais y Teritorio Ultramar di Union Europeo. Esaki ta nifica acceso na fondo y programa Europeo, pero den practica institucionnan y gobierno na Aruba frecuentemente ta topa obstaculo burocratico: proceduranan di aplicacion compleho, barera di idioma den implementacion di regulacion y falta di suficiente informacion for di Brussel.

Durante e foro, representante di diferente isla a papia abiertamente riba e frustracionnan aki. Temanan cu a keda bin dilanti ta e transicion energetico, infrastructura digital y falta di perspectiva economico pa e hobennan Arubiano.

Maij: “Habitantenan di Aruba ta ciudadano Europeo. Pero den practica nan ta experencia obstaculo recurente pa percibi y conclui algo. Esaki mester cambia.”

Combersacion cu lidernan Arubiano

Durante su bishita, Maij a sostene combersacion cu Prome Minister Mike Eman, como tambe cu Ministernan Gerlien Croes (Educacion y Asuntonan di Reino), Mervin Wyatt-Ras (Asuntonan Social) y Rene Herdé (Infrastructura). Tambe e a sostene combersacion cu lidernan di fraccion den Parlamento di Aruba.

E pregunta central tabata con Aruba por haci miho uzo di locual Europa tin pa ofrece y cual obstaculo mester elimina prome pa logra esaki.

Educacion, mercado laboral y sindicato

Un aspecto cu a resalta tabata enfoke riba educacion y labor. Maij a bishita University of Aruba y Stichting Katholiek Onderwijs Aruba, y a papia cu sindicato FTA riba condicionnan laboral y preocupacion economico di trahadonan riba e isla.

Hustamente aki ta unda, pa hopi Arubiano, e realidad diario ta situa: con politica Europeo ta traduci na trabou, educacion y perspectiva di futuro riba un isla cu cerca di cien mil habitante.

Derecho di voto den eleccion Europeo

Un tema cu no ta haya hopi atencion pero cu si ta relevante: Arubianonan, como ciudadano Europeo, tin derecho pa vota den eleccion Europeo. Den practica, pa hopi hende esaki no ta cla of no accesibel. Maij kier pa esaki cambia.

“Participacion democratico no ta un fabor, e ta un derecho. Tambe pa e habitantenan di Aruba.”

Parti di un cuadro mas amplio

E bishita na Aruba no ta un evento isola. Maij a sostene anteriormente tambe combersacion cu lidernan na Corsou y Boneiro. Den periodo binidero, e kier tuma paso concreto, incluyendo miho informacion riba fondo Europeo y linea di comunicacion directo entre Parlamento Europeo y e islanan.