Den presencia di Prome Minister Mike Eman, a tuma luga un encuentro di gratitud na Bestuurskantoor (Cocolishi), unda un grupo grandi di hoben y lider di grupo a ricibi certificado di reconocimento pa nan participacion durante e Bishita Real di Su Majestad King Willem-Alexander.

E acto di reconocimento tabata dirigi na esnan cu a forma parti di e actividad di plantacion realisa dia 18 di maart, den cuadro di celebracion nacional di Status Aparte y Himno y Bandera. Durante e ocasion, hobennan di diferente grupo a contribui activamente na creacion di un parke urbano nobo na interseccion di Adriaan Laclé Boulevard cu Henny Eman Boulevard.

E iniciativa di reforestacion ta considera un exito, danki na entusiasmo, dedicacion y energia positivo cu e participantenan a mustra. E actividad a simbolisa no solamente participacion huvenil, pero tambe compromiso cu naturalesa, comunidad y futuro di Aruba.

Durante e ceremonia, Prome Minister Mike Eman a expresa su aprecio profundo na e hobennan y lidernan di grupo, resaltando importancia di involucra generacionnan nobo den iniciativa cu ta contribui na desaroyo sostenibel di e isla.

E entrega di certificado a sirbi como muestra di gratitud pa e aporte di tur participante, y como estimulo pa continua participa activamente den proyecto comunitario y ambiental.

E encuentro a transcuri den un ambiente di celebracion y reconocimento, marcando un momento special di union entre huventud, comunidad y liderazgo.