Apertura oficial di e kiosco “MiPensioen” di Social Security Bank Aruba na MFA Noord a tuma lugar dia 13 di maart 2026. For di e dia di apertura, reaccion positivo a sigui for di comunidad. E introduccion di e sistema digital aki a mustra claramente e importancia di hasi servicio di pension mas accesibel pa tur ciudadano, specialmente esnan cu ta biba den bario di Noord.

Durante e apertura oficial, Mike Eman a enfatisa cu e proyecto a nace for di un necesidad real den comunidad, unda cu hopi pensionado tabata falta mas asistencia personal pa atende nan preguntanan y preocupacionnan. Pa e motibo ey Mike Eman a pidi SVB pa trece servicionan di pensioen mas cerca di e bario.

Segun Eman, e kiosco na MFA Noord ta e prome paso di un plan mas amplio pa decentralisa servicionan: “E kiosco digital ta permiti bo haya informacion y maneha bo pensioen tur dia, pero loke ta mesun importante ta cu dos biaha pa siman tin personal presente pa asisti, scucha y splica”.

Eman a agrega cu despues di e cambio y aumento di pensioen, hopi pregunta a surgi den comunidad, cual ta haci asistencia directo mas necesario ainda:

“Gobierno kier pa cada pensionado tin claridad y guia, pasobra tin hopi pregunta riba nan pensioen.

Desde e apertura, reaccion positivo a sigui den comunidad. Pensionadonan ta apresia specialmente e combinacion di servisio digital cu asistencia personal.

Durante e bishita di awe na MFA Noord, varios pensionado a comparti nan experiencia positivo cu e kiosco. Sr. Ronny Croes a indica cu e sistema ta “hopi bon y hopi facil pa uza” El a confesa cu, aunke e no ta asina bon cu tecnologia, el a logra uza e mashin sin problema. Croes a bisa cu el a bin wak su pensioen y pa busca su papelnan, y tur cos a bay hopi bon.

Tambe Croes a señala cu e facilidad di acceso na MFA Noord ta un bentaha grandi, indicando cu e ta mas facil pa uza e kiosco cu pa bay oficina di SVB, pasobra tur cos ta mas lihe y conveniente.

Oficialmente, Haime David Sievinger a pone enfasis riba e impacto positivo di e kiosco den comunidad. Sievinger a indica cu e idea di e kiosco ta pa yuda hende den nan mesun bario:

“Den menos cu tres minut, bo por haña bo informacion y imprimi bo papelnan. E sistema ta rapido y accesibel.”

Sievinger a agrega cu e iniciativa aki ta forma parti di un vision mas grandi di Prome Minister Mike Eman pa modernisa servicionan publico y haci nan mas cerca di pueblo.

Ora tende e pensionadonan, ta bisto cu mayoria ta satisfecho cu e proceso. Aunke no ta tur pensionado ainda ta na altura di e existencia di e kiosco na MFA Noord, hopi ta informa nan mes ora nan yega na e localidad y ta haya guia na help desk.

Debi na e exito di e facilidad aki, mas pensionado a expresa nan deseo pa mira e programa expande pa otro comunidadnan. Entre e sugerencianan menciona tin MFA Paradera, Santa Cruz y Savaneta, pa asina mas pensionado por beneficia di e mesun facilidad aki.

E introduccion di e kiosco MiPensioen na MFA Noord ta representa un paso importante den modernisacion di servicionan publico na Aruba, cu e meta pa haci esakinan mas eficiente, accesibel y cerca di pueblo.