Gobierno Noticia

Minister Maduro di Cultura ta informa:

Sclavitud ta un topico cu mester papia riba dj’e. Otro aña ta cumpli 160 aña di Abolicion di Sclavitud den Reino Hulandes. Hulanda ta prepara pa brinda despensa pa e actonan haci contra dignidad humano haci den nos historia comparti den Reino Hulandes. Na e momentonan aki tambe denter di Reino ta sondea na ki manera lo por brinda un reparacion pa e daño haci. Na Aruba e topico di sclavitud no ta ser papia hopi di dj’e y pesey un dialogo a wordo habri cu algun grupo di interes, ‘stakeholders,’ cu e meta pa conscientisa comunidad riba e topico di ‘Sclavitud na Aruba.’

Noticia Salud

Departamento di Salud Publico :

ORANJESTAD, Aruba – 14 di november 2022. Mundialmente tabaco ta mata rond di 6 millon di persona cada aña. Esaki ta mas of menos un morto cada 6 seconde segun World Health Organization (WHO). Mas cu 5 millon di e mortonan aki ta aconsecuencia di uzo directo di tabaco mientras cu 600.000 ta resultado di personanan cu no ta huma pero ta ser exponi regularmente na huma di tabaco, kendenan ta ser yama ‘second-hand smoker’. Uzo di tabaco ta un factor di risico hopi comun den desaroyo di malesanan no transmitibel bou malesanan no transmitibel ta referi na entre otro malesanan manera cancer, malesa cronico di e sistema respiratorio, presion halto, diabetis, malesa cardiovascular, obesidad y mas. Mundialmente 14% di tur morto aconsecuencia di malesa no transmiti bou di adultonan di 30 aña of mas ta relaciona cu uzo di tabaco directo of indirecto.

Noticia Social

Aruba Bank Yegada di Sinterklaas :

Oranjestad – 14 di November 2022 – Diadomingo mainta un cantidad grandi di mucha hunto cu nan mayornan a yega Aruba Ports Authority (APA) pa e dia tan spera di yegada di Sinterklaas. Aruba Bank ta contento di a aporta na e celebracion anual di nos comunidad.

Gobierno Social

Minister Maduro :

Diadomingo mainta Minister Maduro di Cultura a yama Sinterklaas y su Pietnan bonbini na waf di Harbour Arena. Dilanti un multitud grandi di mucha presente na waf, e mandatario a splica Sinterklaas cu tur mucha a haci bon mucha na Aruba y ta pidi Sinterklaas pa trece e regalo di mas bunita pa tur mucha, cual ta amor y alegria. Sinterklaas a sorprende Minister Maduro cu e bunita buki ‘Academia di Piet’ den cual Sinterklaas ta splica tur e cambionan cu tin cu e celebracion di Sinterklaas y su Pietnan di color. Cada color tin un bunita nificacion y pesey e biaha aki Sinterklaas ta desea pa tur mucha haya sa di nan.

Husticia Noticia

Polis y personal administrativo a wordo promovi

Altocomisario Arnhem a cambia rango di un agente policial extra ordinario cu durante su trabou como agente policial a haya un accidente pisa cu t’e ainda e ta recuperando di su salud. Ta trata aki di polis A. CROES. Un polis cu maske tur e retonan cu ela wordo confronta cune a keda positivo y sigui brinda Aruba cu su servicio sin igual. Cu su pasion y determinación nos ta mira cu e tin e curason di Polis pa maske con difícil e circumstancianan por ta,  e la sigui padilanti. Nos ta yama Sr. CROES danki pa su determinación y awor por conta cu un rango mas halto for di Brigadier eerste klasse pa Hoofdagent.

Noticia Politica

Lider di Fraccion di AVP mr. Mike Eman:

Cu HOPI FANFARIA Gabinete Wever Croes a anuncia cu un tono di celebracion cu nan a logra un surplus presupuestario pa anja 2023. Esaki ta indicativo pa locual ta spera nos pueblo pa e ana 2023 alabes ta confima mas medida doloroso riba nos pueblo. Esaki ta reaccion di Lider di Fraccion di AVP mr. Mike Eman despues di constata cu surplus lo worde busca for di saco di pueblo: aumento di BBO, dividendo di companianan di utlilidad cu ta haya e placa aki for di aumento di prijs di awa y coriente, no kier subsidia aumento di gas domestico, pago pa remedi, cobramento feroz di loonsubsidie cu ponemento di beslag, aanslagen di belasting ambtshalve cu no tin pia ni cabez; aumento di un cantidad di leges y otro medidanan.

Noticia

Parlamentario Shailiny Tromp-Lee:

E casonan aki no ta yuda nada den e recuperacion di confiansa di pueblo cu nos tur como politico ta traha of lo mester traha riba dje. Pasobra e tristo realidad ta cu eyfo hopi ta pensa y bisa cu tur politico ta corupto, y esey pa mi ta inaceptabel! Pasobra esey sigur no ta e caso. Mi mester bisa cu mas y mas mi scucha y lesa di e caso Avestruz mi no por conclui otro cu e situacion cu ta keda presenta, cu echos y prueba, ta uno hopi grave y di condena. Tin algun cos cu pa basta tempo ta conoci, pero ayera ora bo ta scucha tur cos, un tras di otro, bo ta keda asombra con tin hende ainda por cana cabes na laira y sin ningun tipo di berguensa.

Deporte Gobierno

MINISTER ENDY CROES

ORANJESTAD: Diahuebs anochi den un esfera ameno a tuma luga introduccion di un proyecto nobo pa deporte di baseball “Proline Winter Baseball League”. Durante e “Drafting Night” e cuater ekiponan, manager y “coaching staff” a keda conoci. Ekiponan di Panthers, Tigers, Lions y Jaguars lo midi forsa contra di otro pa seis siman largo pa conkista e titulo di campeon, di e prome edicion di Proline Winter League. E campeonato di baseball lo bira uno di aproximadamente 40 wega di hungadonan den e edad di 18 aña pariba hungando den baseball na e.o. Aruba, Curaçao, Italia, Hulanda, Czechoslovakia y Merca.

Gobierno Noticia

Secretarario General di MEP, Endy Croes:

Diahuebs ultimo Ministerio Publico a traves di fiscalnan Rethmeier y Van Erp a lesa e requisitoir den corte dilanti hues den presencia di e acusadonan. Ta trata di un total di 12 acusado pero di cual e “inner circle” di Benny y AVP ta un man di hende cu a facilita e corupcion considera esun di mas grandi den historia di Aruba. Nunca antes a pasa den un mandatario nan cabes den e ultimo 50 añanan pa masacra y horta Aruba na e manera aki y enrikece un grupo di amigo.

Gobierno Salud

Minister Dangui Oduber

ORANJESTAD – Diabetes ta wordo categorisa como un malesa no transmitibel. E malesanan aki tin e tendencia di un duracion largo y ta e resultado di un combinacion di factornan. Diabetes por ta genetico of por desaroya dor di un bida no saludabel. Diabetes ta causa problemanan cardiovascular, ceguera, problema cu riñon y amputacion di pia. Na Aruba tin casi 10 mil persona cu ta uza un remedi pa diabetes cu ta representa 8% di e poblacion. Minister Oduber a menciona cu diabetes tin atencion di Gobierno y ta forma parti di e plan nacional di prevencion di malesanan no transmitibel.