Eduard Pieters fractiemedewerker PPA: “A pesar di 22 aña di oficialisacion di nos idioma Papiamento tin hopi pa haci”

Celebracion di 22 aña di Papiamento como idioma oficial

Dia 21 di mei 2003 nos idioma Papiamento a marca un paso di sumo importancia, un lucha cu a inicia for di hopi decada atras, pero finalmente a mira luz ora cu e Ordenanza Nacional Idioma Oficial Papiamento AB 2003 no.38. P’esey awe ta un dia cu sigur mester celebra, pero tambe para keto un rato, pa analisa unda nos ta para cu nos idioma Papiamento y kico nos mester haci ainda, pa fortalece su posicion como nos idioma materno y idioma oficial, band’i Hulandes.

Carta oficial na Papiamento

“Desde 2003 gobierno di Aruba por saca oficialmente su cartanan y comunicadonan na Papiamento. E Ordenanza Nacional aki ta duna espacio na nos propio hendenan, di cual mayoria ta papia Papiamento, e herment pa manda corespondencia y carta na Papiamento pa gobierno”, Eduard a subraya. E historia di Papiamento ta uno cu sigur tur Arubiano, como esunnan cu ta biba kinan, tin derecho di sa y asina hunto nos por balora y respeta nos idioma hopi mas.

Como ciudadano ta importante pa sa bo derechonan relaciona cu e posicion huridico di Papiamento. “Si haya un carta di gobierno na Hulandes, como ciudadano bo tin derecho pa laga traduci esaki si gobierno nenga pa hacie. E ciudadano por bay e departamento di LAR y por exigi esaki” Pieters a indica.

Discrepancia di articulo 5

Sinembargo den e mesun ordenanza nacional aki, netamente articulo 5, ta indica cu tur loke ta trata e cuadro huridico, mester ta na Hulandes. Segun Pieters: “Esaki ta un discrepancia y nos mester cambia esaki, pa nos por tin nos leynan y tur loke ta cuadro huridico na Papiamento tambe como nos idioma oficial. Di e forma aki nos ta duna nos idioma e respet y balor incluso den e area legislativo”.

Importancia di un instituto linguistico

“Como fraccion di PPA nos ta boga pa Aruba por lanta un instituto linguistico nacional, cu ta percura pa nos traha riba desaroyo di Papiamento integralmente. Un instituto cu lo traha strategicamente riba e status di Papiamento y asina nos por balora nos idioma mas y kita e berguensa falso cu ainda ta existi den nos hendenan. Ainda tin hende cu ta pensa cu Papiamento ta un dialecto, of cu si bo ta papia Papiamento bo no ta sabi”, Eduard a señala.

Ta importante pa e instituto traha riba distribucion di Papiamento y asina e drenta den tur skina. E corpus pa por desaroya mas materialnan na Papiamento y traha strategicamente na e imagen y prestigio di Papiamento.  E desaroyo optimal di Papiamento, fraccion di PPA ta bay defende y haci tur loke ta posibel pa sigui lucha pa e status igual y duradero di nos idioma Papiamento.