Publico a disfruta di un Dia Internacional di Museo diferente den Playa

 Un publico varia a sali for di cas diadomingo ultimo apesar di tabata calor. Danki na Arubatram, local y turistanan a haci uzo di un oportunidad unico pa pasa bishita organisacionnan cu a habri den Playa pa celebracion di Dia di Museo. Grandi y chikito a disfruta di diferente actividad (re)creativo, artistico, informativo y educativo cu e organisacionnan a ofrece.

Muchila Creativo a habri e exposicion di arte visual di studiantenan neuro diverso y a duna guia interactivo na bishitante cu alaves por a participa na tayernan artistico. Studiantenan di Violet Center of the Arts a entretene publico cu bunita baile. Na Space 67 bishitantenan a haya un bista di e plannan masha interesante pa futuro di e espacio aki.  Na Checkpoint Colors por a admira e interior y disfruta di un koffie gratis. Museo MetaCorp a impresiona cu su exposicion historico di su companianan desde 1920. Museo di Bijbel na Kerki Protestant a asombra bishitantenan cu ehemplarnan mas antiguo di buki na Aruba y e storianan su tras.

Studiantenan di Universidad di Aruba a prepara e exposicion interesante “Framing Social Problems and Solutions Photo Exposition” na Biblioteca Nacional Aruba. Na Arubiana Caribiana a duna guia continuo di e coleccion nacional y special, mustrando documentonan incorpora den e registro di UNESCO ‘Memory of the World’ y e expo di monumentonan di Aruba. Na Archivo Nacional Aruba bishitantenan a tuma nan tempo pa mira e exposicion di Di Dos Guerra Mundial y e expo di 75 aña di ELMAR N.V.

Stichting Rancho a guia algun grupo den e “Museo den aire liber” den e bario historico Rancho. Na MANA chikitinnan a gosa di e ‘kidscorner’ unda nan a transforma den Indjan. Auditorio a yena dos biaha pa e lectura di arkeologo Raymundo Dijkhoff tocante Santana Sta. Cruz 35. Hopi a admira e exposicion temporario nobo “Origen Caribense, den Pret y Fantasia”. Esaki ta duna un bista riba 25 aña di participacion di sra. Rita Werleman den “Los Laga Bai”, y su participacion den festival di Calypso y Roadmarch como cantante “Queen Hortense y su Decibels”.

Esnan cu a participa na e competencia di Dia di Museo por entrega ainda e formulario completamente yena te diabierna dia 6 di juni 2025 na Muchila Creativo, Caya G.F. Betico Croes 83 (na otro banda di Coco Plum Restaurant of na MANA, Schelpstraat 42, (patras di Kong Hing Supermarket).  Asina ta participa pa gana diferente premio manera un “bustour expedicion arkeologico”, cortesia di UNOCA y MANA. Archivo Nacional Aruba a pone e premio di stamboom di famia disponible y Biblioteca Nacional Aruba ta regala un di e ganadornan un pakete di buki cu termo cu logo. Alaves tin algun premio di tickets pa cinema, cortesia di MetaCorp.

Nos ta gradici un y tur, reconociendo e aporte di medionan di comunicacion, cu a yuda haci e dia aki uno exitoso. Tambe ta habla danki na tur aliado cu a dicidi di habri nan porta pa publico pa Dia di Museo. Ta desea di gradici City Inspector cu a haci esfuerso tremendo pa haci un limpiesa den bario di Rancho y den Caya Grandi. Ta gradici tur boluntario cu a pone nan tempo y energia pa yuda riba e dia aki y tur bishitante cu a bishita activamente e diferente localidadnan riba Dia di Museo 2025! Keda pendiente pa Dia di Museo 2026!