Parlamentario Evelyn Wever-Croes: PRONTO NOS LOOCALNAN POR GOZA DI E BUNITA PROYECTO MALMOK BOARDWALK CU E GOBIERNO ANTERIOR DI GABINETE WEVER-CROES A LAGA ATRAS

Fase 3 di e proyecto Malmok Boardwalk ta den pleno ehecucion

ORANJESTAD –  Diaranson ultimo, Parlamentario Evelyn Wever-Croes hunto cu coleganan Parlamentario Dangui Oduber, Xiomara Maduro y Endy Croes a bishita e proyecto Malmok Boardwalk cu ta un proyecto cu a inicia bou Gabinete Wever-Croes. Actualmente e proyecto aki ta den fase 3 cu lo ta di Fisherman’s Hut pa Ritz Carlton Hotel, y lo sigui cu fase 4 cu lo conecta Ritz Carlton pa Radisson Blue. Fase 4 tambe Gabinete Wever-Croes a laga cla pa ehecuta. Unabes cu fase 4 keda cla, tur e hotelnan lo ta comunica cu otro via e boardwalk, haciendo e area mas agradabel pa turista y localnan por cana di un hotel pa otro.

EVELYN WEVER-CROES:

Parlamentario Evelyn Wever-Croes a expresa cu e ta hopi orguyoso di e proyecto aki cu su gobierno a laga atras, paso e por mira cuanto local y turista ta haci uzo di dj’e. E ta gradici su colega Dangui Oduber cu tabata ex minister di turismo y Aruba Tourism Authority pa nan vision y esfuerso den crea un bunita proyecto asina pa nos isla.

DANGUI ODUBER:

Parlamentario Dangui Oduber a splica cu e proyecto di Boardwalk Malmok tabata un inversion grandi cu Gabinete Wever-Croes a haci pa asina embeyece e area di Malmok, dunando asina pueblo bek un area pa nan por uza pa recrea. Hopi ta e localnan y turistanan cu ta haci uzo di e area aki pa deporte. P’esey e ta spera cu e gobierno nobo continua cu e proyecto aki cu ta den gran beneficio di nos comunidad.

ENDY CROES:

Parlamentario Endy Croes na su turno tambe a duna palabranan di elogio y gradicimento na su colega Dangui Oduber cu tabata e minister di turismo durante Gabinete Wever-Croes pa su trabou duro y vision den crea un proyecto no solamente bunita pero den bienestar di nos pueblo, paso ta hopi local incluyendo su mesun persona ta haci uzo di e area aki pa haci deporte.

XIOMARA MADURO:

Parlamentario Xiomara Maduro a indica cu na momento cu un gobierno hiba un maneho responsabel, ta resta fondo pa asina por haci inversionnan necesario pa e pais. Danki na e maneho financiero responsabel di e gobierno anterior di Gabinete Wever-Croes, awe Aruba por goza di un bunita proyecto na Malmok. Malmok Boardwalk ta un inversion grandi  cu no solamente lo beneficia nos bishitantenan sino tambe nos localnan