Nos t'ey pa Informa bo
E siman aki Parlamento ta trata Presupuesto 2023 cu ta un presupuesto historico pa nos Pais. Despues di 15 aña Gobierno ta logra entrega Presupuesto 2023 na tempo na Parlamento. Presupuesto 2023 ta contene un surplus di 63 miyon florin cu ta 1% di nos GDP. Ta prome biaha den historia cu full oposicion ta keda sin presenta den Sala di Parlamento pa trata e Ley di mas importante di nos Pais. Gabinete Wever-Croes ta skirbi un historia positivo pa nos Pais.
Recientemente mi a reuni cu sr. Gregory Fung a Fat, presidente di United Farmers Aruba (UFA) y sra. Giselle Lacle. Segun nan experencia y conocemento di y nan miembronan ta necesario pa varios departamento y/of gremio aporta na e industria di sector primario e.o. DIP, ELMAR, WEB, Douane, DWJZ, UvA y Comerciantenan Uni. Experencia na e momento aki ta cu no tur stakeholders ta riba mes un linea. Pa e vision por ta un exito, e mester wordo carga door di tur partners. Pesey nos autoridad riba tereno di sector primario, Santa Rosa, mester ricibi su hendenan, experticio y tools necesario, traha riba su “network” pa berdaderamente e por eherce su funcion pa cu un pilar economico nobo.
Durante su disertacion den e reunion publico den Parlamento pa trata Presupuesto 2023, Prome Minister Evelyn Wever-Croes a contesta preguntanan cu Parlamentarionan a dirigi na dje. Tocante e relacion cu Hulanda, Prome Minister a expresa cu relacion cu Hulanda ta bon. Gobierno di Aruba ta purbando pa haci tur loke ta posibel manera cu Gobierno a compromete, pa evita e aanwijzing. Gobierno ta den cumplimento.
Relaciona cu e pregunta di e luznan na Bernhardstraat, haci pa Parlamentario Alvin Molina, Prome Minister a indica cu e ponemento di luznan a wordo entrega caba den man di Elmar. Pa cu e proceso aki, Elmar a busca un consultant pa asina hunto traha un “business plan” na unda ta indica bou ki condicionnan nan lo tume over. Elmar ta actualmente den diferente reunion cu e consultant na unda Bernhardstraat a wordo poni como prioridad, mientrastanto testnan ta wordo haci pa busca un solucion pa Bernardstraat. Prome Minister a informa cu e idea ta pa reemplasa tanto e mastnan como e luznan prome cu fin di aña 2022.
Limitando e deduccion na “leggerwaarde” ta un medida extremo contra e companianan cu ta doño di propiedad grandi. Marando e maximo deduccion na e leggerwaarde ta causa consecuencia pisa pa resultado financiero. E ta un medida cu ta kibra clima di inversion na Aruba. Na Corsow, por ehempel, e limite ta hopi mas abao, na 50% di leggerwaarde. Mientrastanto, ta departamento di impuesto ta unilateralmente determina e leggerwaarde, y e dos gremionan grandi ta cuestiona si e departamento ta cualifica y motiva pa e responsabilidad di determina e balor di propiedad na un manera husto.
Altocomisario Arnhem a cambia rango di un agente policial extra ordinario cu durante su trabou como agente policial a haya un accidente pisa cu t’e ainda e ta recuperando di su salud. Ta trata aki di polis A. CROES. Un polis cu maske tur e retonan cu ela wordo confronta cune a keda positivo y sigui brinda Aruba cu su servicio sin igual. Cu su pasion y determinación nos ta mira cu e tin e curason di Polis pa maske con difícil e circumstancianan por ta, e la sigui padilanti. Nos ta yama Sr. CROES danki pa su determinación y awor por conta cu un rango mas halto for di Brigadier eerste klasse pa Hoofdagent.
ORANJESTAD-Durante tratamento di presupuesto 2023 den Parlamento, Prome Minister Evelyn Wever-Croes a ricibi e peticion di Parlamentario sra. Shailiny Tromp-Lee pa duna un “update” con ta bayendo cu ehecucion di e landspakket. Riba e peticion aki, Prome Minister a informa Parlamento cu e proceso di ehecucion di e landspakket ta bayendo bon. E ekipo di “trekkers” pa cu e diferente temanan, ta consisti di personanan hopi dedica y determina. Prome Minister a splica cu loke si ta keda un punto di preocupacion ta e capacidad y financiamento. Mirando cu ta e mesun personanan ta haci e mesun trabounan ta pone cu e trabounan ta bira un poco mas duro. Pa e motibo aki, Gobierno di Aruba ta den combersacionnan cu Hulanda y tin como proyecto pa extende e capacidad pa por logra haya mas financiamento.
Diabierna 11 november y dialuna 14 november minister sra. Xiomara Maduro y minister president sra. Evelyn Wever Croes a presenta den Parlamento pa duna cuenta di e presupuesto di nan carteranan respectivo. Mesora ora minister Xiomara Maduro a yega el a entrega un nota di cambio, cual tabata cumpli cu tur rekisitonan di CAFT y RMR. Pa por a cumpli cu e 1% di surplus, cu ta mas o menos 63 miyon florin, a introduci BBO na grens y tambe a crea un begrotingsfonds Pandemische Veerkracht en innovatie. E introduccion di BBO na grens lo mester zorg pa 35 miyon florin extra cual lo mester drenta caha di gobierno. Sinembargo, pasobra esaki lo keda introduci te na prome di Juni 2023, e entrada di esaki lo ta 15 miyon florin so pa 2023. Ademas lo cuminsa activa e Begrotingsfonds PVI, cual lo bin den lugar di e Aruba Travel Insurance-noodbijdrage, cual ta $15 of 27 florin pa turista. Di e placa cu lo drenta lo destina 35% pa e fonds aki y 65% pa Algemene Middelen di e pais. E entrada cu lo wordo ricibi di esaki lo ta aproximadamente 25 miyon florin.
ORANJESTAD: Diabierna atardi riba cancha di Denzel Dumfries di Cruyff Foundation na Jaburibari a tuma final di futbol femenino pa scolnan avansa den deporte escolar. E cuater scolnan Colegio Arubano, Colegio Nigel Matthew Aruba, EPB San Nicolas y La Salle College Aruba a bataya pa mira ta conkista e titulo maximo. Minister Endy Croes tabata presente pa duna sosten y apoyo na e futbolistanan den e final den Deporte Escolar 2022.
ORANJESTAD: Diadomingo mainta na Compleho Deportivo Frans Figaroa a tuma luga campeonato nacional di peso. Mandatario di Deporte a hiba palabra durante ceremonia di apertura di Aruba Nationals Championship 2022 organisa pa Amateur Weightlifting Association. Un total di 26 atleta local femenino y masculino a participa den categoria; “Youth Junior”, “Senior” y “Masters”. Ganado den categoria masculino senior: Laertes Araque cu 257 kg. Ganado absoluto den categoria femenino ta Nathaly Geerman cu a hisa total 195kg. Den categoria “youth” ganado absoluto hende muhe Caythyline Lanoy cu 123 kg. Den categoria masters ganado absoluto ta Rene Rudel cu a hisa 228kg. Minister Endy Croes ta felicita Amateur Weightlifting Association y tur cu a contribui pa haci e competencia uno exitoso! Masha pabien na e ganadonan.
