Scol di Musica “E Porta pa Harmonia” lo trece un cambio positivo den e bario di Noord.

Diamars anochi, Prome Minister mr. Mike Eman, a duna un presentacion di “E Porta pa Harmonia” cu lo ta un scol di musica pa e comunidad di Noord. E Porta pa Harmonia ta un proyecto cu Gobierno kier desaroya hunto cu Muziekschool y FCCA.

Durante di e bishitanan den bario, e habitantenan ta vocifera nan deseonan pa mehora nan bario, y Gobierno a mira e necesidad pa trece actividad y facilidadnan den bario pa duna un empuhe positivo y constructivo na e ambiente den cada bario. Un scol di musica den e bario di Monserat, ta hustamente pa duna e hobennan y adultonan, e oportunidad pa siña toca un instrumento y desaroya nan mes musicalmente.

E plan ta pe keda cla cu e trabaonan di renobacion pa 1 di september proximo, y den e periodo inicial lo involucra esnan interesa pa yuda duna contenido na e lesnan basa riba e instrumentonan cu kier siña toca. Esnan presente e anochi aki, a expresa nan gratitud na Gobierno pa e proyecto aki y ta ancioso pa mira esaki bira un fuente di creatividad y inspiracion pa e bario.

Harjan Meijer, habitante di Semeleerstraat y alabes musico, ta sumamente antusiasma pa e proyecto aki y cu su 16 aña di experiencia como musico, ta cla pa duna sosten si mester. E proyecto aki lo sirbi e hobennan di e bario bon y tin como meta pa yuda wanta e hobennan for di caya.

Theresa Ortega, otro habitante di Semeleerstraat, ta hopi contento cu ta bay habri un scol di musica den Semeleerstraat pa e muchanan di bario y ta spera cu e mayornan stimula nan yiunan participa y siña toca musica y keda entreteni y leu for di caya. Sra. Ortega no a perde e oportunidad pa expresa su gratitud na Prome Minister Eman, pa e aumento di 250 florin pa tur pensionado. “Mi ta hopi contento cu Mike Eman, Dios a touch su curason pa e pensa riba e grandinan, hopi danki”, ta locual Sra. Ortega a expresa.

Segun Prome Minister Eman, a scohe e nomber “E Porta pa Harmonia” cu tin multiple nificacion. E “Porta” ta duna e mensahe cu e portanan di e scol di musica aki realmente ta habri pa comunidad y ta e porta habri pa oportunidad pa esnan cu kier siña toca un of mas instrumento of desaroya nan habilidadnan musical. Ademas e palabra “Harmonia” ta conecta automaticamente cu musica, pero tambe ta refleha e meta di gobierno pa trece union y harmonia den e bario di Monserat.

Prome Minister Eman a gradici FCCA pa e kere den e vision aki pero tambe na sr. Carlos Bislip cu lo carga e scol di musica aki y desaroya talentonan hoben y expone talentonan scondi den e bario