Alumnonan di Mon Plaisir Basis School 6de klas di bishita na COA

A duna tour di cas di Comite Olimpico Arubano y conta sobre Olimpismo

 Siman pasa a ricibi bishita di alrededor di 50 mucha cu ta den 6de klas di Mon Plaisir Basis School, como meta di educa e grupo di deporte, balornan Olimpico y kico kiermeen Olimpismo. E bishita aki a ser organisa door di Juliandrah Rodriguez cu como docente na Mon Plaisir, a participa den 2024 como “Youth Olympic Ambassador” representando Aruba na Olympia, Grecia.

E tour aki a conta cu un recorido di e edificio completo, ambos paden y pafo, unda a splica e diferente areanan di interes, como por ehempel e banner cu nos atletanan local y e significado di e renchinan Olimpico. E obhetivo di un bishita asina ki ta pa no solamente splica y duna informacion riba kico tur COA y e mundo Olimpico ta representa, si no tambe pa inspira y motiva nos hobennan pa forma parti di e mundo di deporte, cuminsando di hoben door di practica deporte y haci movecion. Hopi di e muchanan a indica di haci deporte caba y ta desea pa un dia logra di tambe representa nos isla na nivel internacional.

COA ta gracidi Mon Plaisir Basischool, e docentenan cu a yuda guia y tur hoben cu a participa na e bishita aki, y ta spera di bolbe ricibinan den futuro. COA ta semper dispuesto pa duna mas di e tournan aki, como meta di concientisa nos comunidad di e importancia di deporte pa nos comunidad. #TEAMARU