Empleadonan di HOH cu entrenamento pa e Sistema HiX

Un paso importante den prepara e sistema electronico di pashent

Recientemente Horacio Oduber Oduber (HOH) a duna di conoce un proyecto importante cu e meta principal ta eleva calidad di cuido cu ta introduccion di un sistema electronico di pashent (EPD) nobo di e compania Hulandes Chipsoft cu e programa HiX. Pa implementa e plataforma ta importante pa train empleadonan cu tin cu bay traha cu e sistema nobo aki. Ademas, e transicion di e sistema actual pa e nobo aki tin su reto y mester prepara bon pa esaki. Pa cu esaki a tene pa algun siman e asina yama ‘projectopleidingen’ unda cu coleganan a sigui curso di forma digital y tambe despues cu e entrenadornan fisicamente presente.

Planning
Gregory Croeze, Miembro di Hunta Directiva, a expresa cu e planning pa e sistema nobo bay ‘live’ otro aña ta uno bastante preta. P’esey e preparacionnan aki ta sumamente importante mirando cu den luna di augustus ya caba ta cuminsa cu e “inrichtingsweek” unda cu lo hinca e “features” pa cada departamento cu lo uza e plataforma aki. Ta papia aki di e departamentonan di cuido pero tambe di e departamentonan di voeding, radiologia, finansa, bloedbank y mas pa un integracion completo.

Personal envolvi

Virgil Oehlers, Manager di ICT, a bisa cu esaki ta un di e simannan di mas importante pa e team envolvi. Tin mas o menos 200 colega cu ta forma parti di e proyecto enorme aki y durante e ultimo siman un total di 25 “consultants” a bin for di Chipsoft y tambe di Furore pa duna nan training simultaneamente. Esaki berdaderamente ta demostra e magnitud di e proyecto y e personal cu a yega Aruba ta yuda no solamente garantisa progreso den e planning pero ta sinta hunto cu stakeholder y cualkier colega cu tin pregunta ainda pa asisti y soluciona cualkier otro problema cu por tin.

Michael Padaoan y Selene Fabry, ambos nurse di ICU, a conta cu a nan a haya orientacion con e sistema mes ta hinca den otro pero tambe nan a siña con pa traha cune pa despues nan por ehecuta tur locual nan a siña na nan departamento. Shanice Stokes, nurse na departamento di A2, ta spera di por adapta lihe na e sistema nobo y siña mas hopi cu por pa asina duna un miho cuido na e pashentnan riba piso.

Bentahanan pa HOH
Pa finalisa Jacco Vroegop, Presidente di Hunta di Directiva, a duna di conoce cu e ta un proyecto cu nan ta trahando riba dje pa hopi tempo caba y cu awo pa tres siman largo tin personal di Chipsoft y Furore presente pa duna training y sinta den tur training conhunto cu e empleadonan di HOH pa mira cualkier asunto cu por soluciona di biaha. E ta spera mirando e entusiasmo bou di colega cu ta participando ta yuda stimula y motiva otro coleganan den sector di cuido rond di Aruba pa asina por establece HiX na otro organisacionnan tambe.

Cu implementacion di e sistema electronico di pashent nobo aki, HOH ta tuma un paso grandi pa un plataforma integra cu ta garantisa uniformidad y standardisacion den e procesonan di cuido. Tambe lo ofrece entre otro bentahanan manera un miho documentacion y registracion y cuido basa riba data. Esakinan lo conduci na mehora eficiencia y siguridad pa un sosten optimal di cuido y mas atencion na pashent.