PARLAMENTARIO EVELYN WEVER-CROES A ATENDE E PREMIËRE DI E DOCUMENTARIO AWO, NOW, NU
“Nos ta hopi honra cu señora Wever-Croes su presencia na evento aki y pa e reaccion positivo cu señora tabata tin riba e documental. E echo ku señora Wever-Croes a tuma tempo pa combersa cu e hobennan di Corsou y Aruba cu ta parti di e documental ta significa hopi pa nos”
ORANJESTAD – Diadomingo ultimo Parlamentario Evelyn Wever-Croes a atende e premiere di e documentario AWO, NOW, NU cu a tuma luga na Fort Zoutman. E documentario aki ta riba e impacto di e herencia di sclavitud riba nos hobennan. Pa cu esaki a entrevista hobennan di Aruba, Boneiro, Corsou, Saba, Sint Maarten y Sint Eustasius.
Parlamentario Wever-Croes a indica cu e docuemtario aki tabata uno hopi impactante, mirando cu e ta bin for di e perspectiva di e hobennan di awendia, y kico nan sentimentonan ta pa cu e tema aki awe ainda. E topico aki ta uno cu ta wordo papia di dj’e hopi na Aruba, sinembargo e ta un topico cu a afecta grandemente nos historia, y nos herencia. P’esey e ta sumamente importante pa nos conoce nos pasado y nos historia pa asina por comprende nos presente pa ta exitoso den futuro. Ta importante tambe pa sigui papia di e tema aki, cu tabata uno importante pa nos historia, paso ta asina so nos por influencia e rumbo di nos futuro.
“Mi ta gradici señor Roland (Rói / Roy) Colastica, un creador di teatro, director, escritor, y poeta di Corsou cu a dedica su mes na e proyecto aki, Edjean Semeleer di Go Cultura Foundation Aruba pa haci e presentacion, y tur e hobennan cu a tambe a tuma parti den e proyecto aki. Mi ta kere cu e conclusion di e anochi aki ta cu nos na Aruba mester pone mas atencion riba nos herencia, dunando asina oportunidad pa nos hobennan por siña mas riba e topico aki na scol.
Esaki ta un topico cu e gobierno actual mester tuma hopi mas na serio. Lamentabelmente gobierno tabata completamente ausente na e evento aki. Gabinete Wever-Croes durante gobernacion semper a pone hopi atencion na e tema aki y na tur loke ta historia di Aruba. E tempo ey ex Minister di Cultura Xiomara Maduro a traha un documentario tambe. Ban sigui comparti informacion pa asina comunidad completo, specialmente nos hobennan por conoce nos pasado, comprende nos presente pa nos por ta exitoso den futuro” Parlamentario Wever-Croes a expresa.
Na su turno señor Colastica, na nomber di OCW CG, Komité Konmemorashon Herensia di Sklabitut pa islanan Hulandes den Caribe, a gradici Parlamentario Wever-Croes y Parlamentario Maduro pa nan presencia na e evento importante aki. Tambe a gradici GO Cultura Foundation, tur e hobennan den e documental, Ryan Daniel Oduber y henter e team di produccion. “Nos ta hopi honra cu señora Wever-Croes su presencia na e evento aki, y pa e reaccion positivo cu señora tabata tin riba e documental. E echo ku señora Wever-Croes a tuma tempo pa combersa cu e hobennan di Corsou y Aruba cu ta parti di e documental ta significa hopi pa nos” Señor Colastica a expresa.
