Parlamentario Arends-Reyes: Kier mira cuenta anual y vision largo plazo di TPEF

ORANJESTAD (3 di juli 2025) – Miembro di Parlamento y lider di fraccion di AVP, Jennifer Arends-Reyes, tabata esun prome pa hiba palabra durante e reunion publico pa trata e presupuesto di TPEF (Tourism Product Enhancement Funds)  Despues di haci analisis profundo y haya presentacion di e entidad, e fraccion a prepara su preguntanan y presenta nan den sala, enfoca riba e transparencia y strategia tras di e maneho di TPEF.

“Nos a solicita pa presenta e cuental anual di TPEF y na minister di turismo pa comparti su vision.” AVP a duna un enfoke critico y constructivo di con TPEF ta influencia y desaroya e producto turistico di Aruba. P’esey kier sa tocante e direccion y strategia pa futuro, pidiendo mayor claridad riba Minister Cicilia su vision y metanan pa mehora e turismo riba nos isla cu enfasis tambe ariba pariba di brug.

Den su pregunta, Arends-Reyes a enfoca riba e constelacion di hunta di directiva y ki paso lo tuma pa sigura e implementacion exitoso di su plan y mantencion di facilidadnan existente.”No ta interesa djis den sa con TPEF lo ehecuta proyecto, sino tambe con ta garantisa e mantencion y evaluacion continuo di nan.

Ta importante cu nos por evalua si e proyekto a logra su meta, pero si ta mantene di manera sostenibel,” Arends-Reyes a indica. AVP ta enfatisa cu e funcion di TPEF no ta limita na proyecto di corto plazo, sino cu tambe ta necesario pa tin un plan na largo plazo pa sigura cu e beneficionan ta perdura.

Pa e motibo ey, Arends-Reyes a pidi pa haya un plan cu ta inclui metodo pa evalua y midi nan exito. AVP ta keda comprometi na supervisa di cerca e uzo di fondo publico, promove un agenda di claridad, control y bon maneho pa e futuro sostenibel di Aruba