Eduard Pieters di PPA:“Algun luna pasa a vota contra un mocion y awor e mocion aki ta topico di urgencia”

Recientemente Eduard Pieters, miembro di PPA a expresa den un conferencia di prensa riba su preocupacion di actitud di supuesto politica nobo y innovativo cu FUTURO a campaña cu ne. Eduard ta di opinion, cu: “Si un parlamentario presenta un mocion, cu ta pa bienestar comun di pueblo, pakico no por haya sosten unanime? Pero awor e mesun topico di e mocion, ta haya un caracter di urgencia, unda cu e parlamentarionan di coalicion ta bay bishita KIA y wak cu nan propio wowonan, un realidad cu ya PPA a bin ta bati na porta!”.

Un mocion pa KIA pa busca solucion concreto
Na maart 2025, fraccion di PPA, representa pa parlamentario Otmar Oduber, a presenta un total di ocho (8) mocion y un (1) amienda durante e tratamento di e presupuesto. Un di e mocionnan tabata pa enfoca riba e situacion urgente di Korrektie Instituut Aruba (KIA). E mocion a urgi gobierno pa e.o.; tuma un decision definitivo den seis (6) luna tocante e edificio di KIA; aumenta e post pa renobacion; traha structuralmente cu e instancianan relevante riba e programanan di reintegracion y resocialisacion. Pero tambe a haci un apelacion pa e hobennan deteni, haya oportunidad di desaroyo den e actividadnan educativo. Hunto cu e amienda riba e presupuesto, Gobierno di Aruba lo por tabatin e fondo pa haci e mocion bira realidad.

Votacion contra sin motibo balido
Durante e reunion publico pa trata e presupuesto 2025, partido AVP y FUTURO a vota contra e mocion aki. Aunke e proposicion tabata completo y pa bienestar general, ambos partido no a duna nan apoyo. Awor, cuatro luna despues, e mesun situacion di e contenido di e mocion ta bira un punto di urgencia nacional. Segun Eduard Pieters: “Si

un mocion asina util y urgente no ta haya sosten djis pasobra e ta bin for di oposicion, nos sa cu nos no ta den un cambio di politica innovativo y diferente. Simpelmente ta demostrando cu ta djis sigui un estilo bieu, den un bachi nobo”.

Politica nobo ta exigi balentia y coherencia
Pieters ta enfatisa cu si un partido ta campaña cu nan kier hiba un politica innovador, esaki no por ta basa solamente riba slogan, sino riba accion concreto. “Un politica cu ta traha pa pueblo, mester tin balentia pa apoya mocion cu ta sirbi interes comun, sin wak ken a propone. Ta lamentabel cu bienestar di KIA ta bira relevante, ora e mesun coalicion ta haya conveniente pa papia di dje.”

Fraccion di PPA ta keda firme den su compromiso pa tene un parlamento cu ta sirbi pueblo, no un parlamento cu ta basa su voto riba stempel. Si kier papia di un politica nobo y diferente, e estilo mester ta uno cu ta pone pueblo prome, ta evalua e mocionnan segun nan merito y ta traha riba transparencia.