Entre Deber i Lealtat: Eksaminando e Rol di Gezagheber na Boneiru

E  nòmberamentunan resiente di ex-gezagheber Sr. Nolly Oleana den varios komishon i hunta di supervishon ta pone nos para ketu I pensa i hasi algun pregunta: Ki ora o ken ta un bon gezagheber? —i ken e ta realmente sirbi? Interes di e pueblo di Boneiru òf gobierno Hulandes? Historikamente, nos pueblo a wordu eduka kolonialmente pa mira gezagheber komo “tata di pueblo”

Na Boneiru, manera na Antia Hulandes, gezaghebernan ta nòmberá ofisialmente den nomber di Rey of Reina. Pero den praktika, e nòmberamentu ta wordu dirigi pa e autoridadnan I polítikonan Hulandes, hopi biaha sin transparensia òf impakto demokratiko lokal. E situashon aki ta kousa duda si gezaghebernan ta sirbi e pueblo di Boneiru of si nan ta defende interés polítiko i ekonomiko di Hulanda.

E trayektoria di Sr Oleana ta un kaso ku ta duna pa pensa, refleha. Un tempo, e tabata e politiko mas prominente pa lidera den Partido Demokratiko (PDB) i tabata antisipa ku e ta esun ku lo a sigui e lider legendario Jopie Abraham. Pero e liderato a bai pa Sr. Robbie Beukenboom i despues pa Sr. Clark Abraham, yu di Jopie Abraham. Despues ku e la retira for di polítika, Oleana a wordu nòmbra pa e gobierno Hulandes komo Hefe di Ministerio di Edukashon, Kultura i Siensia pa e islanan BES.

E no ta su so den e patronchi aki di re-direkshon polítiko di gezaghebernan:  Konsidera Dr. Glenn Thodé ken, ku tabata gezagheber ku huntu ku e gobernador di Antias Sr Frits Goedgedrag, ku tambe tabata ex-gezagheber di Boneiru, nan dos tabata responsabel pa destrui I para e ley di referendum na 2010—“den interés di Reino,” en bes di pa respet pa derecho di pueblo di Boneiru. Goedgedrag despues a keda nombra komo Komandeur den Orden di Oranje-Nassau i miembro spesial di Raad van State. Thodé tambe tabatin rol determinante den e krísis polítiko di 2011 kaminda un miembro di konseho insular ku un solo asiento a destabilisa gobierno di Boneiru. Thodé despues a retira lamentando ku “Boneiru a pèrdè su kompás moral.” Pero djies despues el a keda nòmbra den komiténan Hulandes di nivel haltu, inkluyendo Komishon Spies, CFT, i den 2024 pa Orden Royal di Reino- Kapitulo di Orden Sivil

Edison Rijna, un ex- bankario i ex-miembro di direktiva di fundashon Pro Directe Banden, un fundashon ligá ku partido politiko Hulandes CDA i raporta pa prensa Hulandes di finansiando i korumpiendo prosesonan elektoral di Boneiru, a bira I wordu re-nombra komo gezagheber pa un di dos termino apesar di varios kontroversia, inkluyendo manehando bao di influensia I diferente investigashonan di korupshon. Aunke tur esaki, Rijna a keda promové I nombra pa un rol internashonal komo Enviádo Spesial di Hulanda na Nashonan Uni—ku ta kousa spekulashon ku e moveshon aki tabata pa wanta, para preshon global riba e situashon di Boneiru ku a wordu ekspone internashonalmente.

Mientras tanto, gezaghebernan ku a para firme I defendé derecho di pueblo Boneriano a keda ekskluí. Mr. Eugene Abdul, abogádo konstitushonal i ex-gezagheber di Sint Eustatius, a retira bao di preshon ningando pa sostene akshonan ku ta mina, viola derecho di outodeterminashon di pueblo Boneriano. Despues di esaki, Abdul no a haña ningun otro puesto di gobierno Hulandes.

Meskos, Dr. Lydia Emerencia, gezagheber di 2012 te 2014.  Emerencia ku a para riba politika I tene duru na integridat I prinsipionan di bon gobernashon I tambe a yuda konsientisa e pueblo ku entre otro un terminologia nobo pa Bonerianonan : “manipulashon kolonial” via edukashon, kultura I ley. Despues ku Emerencia a wordu pusha saka for di gobernashon, Emerencia a trata di sirbi komo direktor di SGB pero tambe a keda kita i reemplasá ku direktor I maneho  Hulandes. Manera Abdul, Emerencia tambe a wordu ekskluí for di nombrashonan Hulandes.

Despues di Oleana, John Soliana a keda nòmbra komo gezagheber. Soliana su promé akshon tabata un karta provokativo pa Ministernan Hulandes di Defensa i Asuntonan Eksterior, pidi pa atenshon militar den Karibe— kontrario I kaminda ku Karibe a wordu deklara internashonalmente komo “zona di paz”  Esaki parse un kambio di rol o funshon entre Oleana I Soliana den hunta di BIA?

E hunta di BIA ta inkluí varios figura kontroversial Hulandes, manera ex-minister di CDA Camiel Eurlings; Jos Hillen, konosí pa kontabilidat kreativo i posibelmente nòmbra den BIA pa su eksperiensia den konbertí e airport militar di Twente na un komersial; i Marco van der Kreeke, ligá ku Hillen, tur dos a sirbi komo direktor di Eelde Airport. Notabel ta ku Soliana a keda nòmbra den hunta di BIA na 2022, prome ku e la bira gezagheber di Boneiru.

Den e konteksto aki, nos mester hasi e pregunta: E nòmbramentu nan aki —inkluyendo di Sr Oleana—ta pa sirbi pueblo di Boneiru? of ta reinforsa un sistema kolonial ku ta rekompensa loyalidat na agenda stratégiko Hulandes?