Atrobe Glenn Thodé ta defende poder enbes di Pueblo

Ryçond Santos do Nascimento

Tito Laclé a saca un relato riba NoticiaCla.com dia 10 di september 2025 den cual e hurista di derecho penal, Glenn Thodé, tabata acusa MEP y PPA di ta haci di un musca un olifante. MEP y PPA ta keha cu gobierno no a informa Parlamento encuanto e contenido di e concepto di rijkswet pa finansas publico sostenibel (Rijkswet HOFA). Ta te despues cu a logra un acuerdo na nivel gubernamental cu Hulanda, gobierno a informa Parlamento. Segun oposicion, gobierno mester a involucra Parlamento hopi mas tempran den e proceso aki, mas ainda como cu ta trata di un rijkswet cu lo tin consecuencia profundo pa derecho presupuestario (budgetrecht) di Parlamento y pa autonomia di Aruba.

Segun Glenn Thodé oposicion no ta compronde cu awor simplemente tin un tratamento di un “concepto” cu mester cana su proceso normal di formacion di un rijkswet. Glenn ta bisa cu na su debido tempo, parlamento di Aruba lo tin e oportunidad pa aproba of rechaza e diseño di rijkswet aki. Ademas Glenn ta acusa oposicion di ta incompetente, of al menos di no ta compronde e idioma Hulandes. Asina e ta tuma distancia for di e campaña di firma di MEP pretendiendo cu esey no ta nada mas cu wega emocional y strategia electoral. Asina aki Glenn ta haci comosifuera e ta neutral, pero en realidad e ta uza e tecnica di framing: e kier presenta su mes como un autoridad riba derecho constitucional y haci comosifuera oposicion ta amateur. Loke Glenn ta lubida den su arogancia ta cu sra. mr. Evelyn Wever-Croes a siña derecho constitucional di Reino no for di buki so, pero durante añanan largo di practica on the front line.

Tambe Glenn ta haci comosifuera cu e proceso di rijkswet ta husto y cu Parlamento, conforme reglanan di procedimiento, ainda lo haya e chens pa aproba of desaproba e rijkswet. E suposicionnan aki ta totalmente ridiculo. Tur experto den derecho constitucional sa cu precisamente akinan e bos di Parlamento di Aruba ta solamente consultativo, mientras cu e rijkswet ta profundamente invasivo den autonomia di Aruba. Articulo 16 di e Statuut ta expresa: “Het vertegenwoordigende lichaam van het land, waarin de regeling zal gelden, is bevoegd vóór de openbare behandeling van het ontwerp in de Tweede Kamer dit te onderzoeken en zo nodig binnen een daarvoor te bepalen termijn daaromtrent schriftelijk verslag uit te brengen.” Crioyo bisa: e articulo aki no ta duna representante di Pueblo ningun, pero berdaderamente ningun derecho pa aproba of desaproba e rijkswet. E resultado ta cu parlamento ta keda efectivamente elemina for di e wega for di momento cu gobierno ta fiha su posicion na Den Haag. No ta ami a inventa e situacion aki. Tanto na Aruba, Corsou, Sint Maarten y Hulanda hende tin un solo nomber pa e caracteristica aki: “democratisch deficit”.

Si AVP-FUTURO tabata tuma democracia na serio, gobierno lo a sinti e obligacion pa consulta Parlamento prome cu core bay cera un acuerdo gubernamental cu Hulanda. Precisamente ora cu un rijkswet ta mete den e derecho presupuestario di nos parlamento y ta atacha autonomia, ta logico cu Parlamento mester wordo involucra for di principio di e proceso. Mas grandi e impacto di un rijkswet ta riba nos autonomia y ordo constitucional interno, mas grandi mester ta e consciencia democratico y patriotico. Parlamento no mag di wordo reduci na e rol inferior di ser consulta despues cu e baca a hoga caba. Compromiso cu democracia ta rekeri duna parlamento e posibilidad real pa eherce influencia desde e inicio. Como cu gobierno ta trapa riba e obligacion aki, e ta mina deliberadamente e confiansa den nos estado di derecho democratico. Hasta gobierno ta mina e legitimidad di e rijkswet mes. By the way: e responsabilidad pa vigila compromiso cu democracia ta conta pa Reino tambe, cu nunca mester a permiti cu e proceso aki ta sigui sin cu gobierno ta consulta parlamento prome.

Ta den e contexto aki nos ta mira claramente cu e argumento di Glenn Thodé no ta cuadra cu e realidad. Su ponencia cu na su debido tempo, parlamento di Aruba lo tin e oportunidad pa aproba of rechaza e diseño di rijkswet aki ta puro nonsens. Ora cu Glenn ta reduci e discusion na un cuestion di fase den e proceso y confusion linguistico, e ta bruha tera pa tapa e nucleo di e problema: e falta di legitimidad democratico di un rijkswet cu ta profundamente intrusivo den nos autonomia. Su framing di e oposicion como emocional of incompetente ta tapa e echo cu e critica di oposicion ta toca precisamente un deficiencia fundamental den e proseso. Mientras cu Glenn kier posiciona su mes como hurista racional cu ta simplemente describi un trayecto formal, e ta ignora e realidad constitucional y politico cu segun Statuut nos Parlamento solamente tin un rol consultativo den e proceso di legislacion di rijkswet. Cu otro palabra parlemento a keda elemina for di e wega. Di e manera aki, Glenn su storia no ta un analisis obhetivo, sino un lembemento na defensa di esun cu tin poder.