RICHARD RI-ANGELO TA E PROME HOBEN PA GANA E PREMIO “HALA DI SHOCO” DI PARLAMENTO

ORANJESTAD – Diamars mainta durante e apertura di aña parlamentario 2025 – 2026, Parlamento a haci entrega di un plakaat na e hoben Richard Ri-Angelo como e prome ganador di e premio “Hala di Shoco”.

Richard ta un hoben di 18 aña cu tin un gran curason pa su comunidad. Na su edad hoben, Richard tin su propio fruteria y durante su tempo liber e ta un barbero, cual e ta fungi desde e veranda di su mayornan. E hoben aki sigur ta un inspiracion pa nos hobennan cu ta carga e ilusion y gana di prospera den bida. Richard ta un muestra cu nada den bida ta imposibel y si bo pone bo mente y determinacion na loke bo kier logra, bo ta logr’e.

E proyecto cu e hoben aki a bin cune a resulta ganado durante Poder di Hubentud 2023 y cu esaki el a cumpra regalo pa tur mucha di Casa Cuna. Tambe e ta pela nos grandinan na SABA boluntariamente y aña pasa el a sirbi como coordinado di e kamp di Playa Pabou. E actonan bunita aki ta refleho di con el a wordo lanta y cria na cas, semper cla pa yuda esnan cu tin mester.

Un di Richard su pasionnan ta pa desaroya su mes den e deporte di futbol, y pa esaki el a logra traha duro pa baha hopi peso. Na su edad ya caba el a logra hopi, pero esakinan ta solamente e comienso di hopi mas. Su determinacion ta grandi, e tin un curason grandi y lo duna tur di su mes pa asina e alcansa tur su metanan. 

Parlamento di Aruba ta hopi orguyoso di bo, Richard! Nos comunidad tin mester di mas hoben(adulto) manera bo pa sigui empodera nos hubentud.