PPA ta scucha y actua: San Nicolas merece mas inversion awor!
Pa Eduard Pieters, miembro activo pa partido PPA, esaki ta e tipo di progreso cu sigur mester di mas sosten. E impacto di e hotel Secrets Baby Beach Aruba na San Nicolas, lo bay hopi mas leu cu solamente empleo. “E hotel aki ta un “state of the art” den e mundo hotelero y un joya parti pazuid di Aruba. Nan a construi algo espectacular sin perde naturalesa y caracteristica di e lugar. Pero e balor berdadero ta den su efecto riba e comunidad di San Nicolas y vecindario,” Pieters a indica.
Inversion mester sosode awor!
Pieters ta papia di un efecto domino cu por cambia San Nicolas y vecindario completo: desde empleo local, brindando mas seguridad, incorpora infrastructura basico, cu ta e prome paso pa un ‘orange economy’ vibrante. “Nos ta kere den arte, cultura, baile, musica, y nos ta kere cu San Nicolas por bira un centro creativo, caminda turismo y expresion cultural ta topa,” el a agrega.
Segun Pieters di PPA, e peticion di San Nicolas Business Association ta hopi cla: inicialmente nan ta pidi luz, verf y mata pa dorna desde promenade bay pariba, specialmente unda e turistanan lo pasa. “Esaki no ta costa gobierno hopi, pero lo duna un sensacion di dignidad y invitacion pa bin pariba. E infrastructura mester sigui desaroya,” Pieters a declara.
Secrets como un trampolin grandi
Na mesun momento PPA ta lamenta masha, cu durante e town hall meeting, sr. Pieters tabata e unico representante politico activo presente. E pueblo di San Nicolas merece un lider cu ta scucha y actua. Pa PPA, e desaroyo di Secrets Baby Beach Aruba no ta un meta final, pero un trampolin. Ta un demostracion cu si bo kier logra cambio real, bo mester pone pueblo prome, presenta plan concreto y actua riba e necesidadnan real. Pieters ta pone enfoke riba responsabilidad di gobierno pa sigui cu un plan integral pa infrastructura, seguridad y stimulacion di emprendemento local.
Compromiso pa sigui lucha
Tur hende ta papia di diversificacion, pero ora bo wak cu un zona completo no ta haya ni un 1% di bo economia turistico, nos mester actua. “Nos mester pensa den futuro di nos hobennan. Nos mester crea un San Nicolas y vecindario, caminda un mama por traha, un tata por inverti, y un yiu por soña,” Pieters ta subraya.
PPA ta compromete pa sigui defende e bos di pueblo, pa asina hiba nos isla na un futuro mas igual, caminda progreso no ta para na Palm Beach, pero ta yega den tur districto, bario y cerca tur ciudadano.
