Parlamentario di AVP, Sonaly Fernandez-Acosta: Conocemento innovativo pa educacion na Aruba despues di conferencia na Panama
ORANJESTAD (20 di mei 2025) – Durante e tres dia di sesion cu e parlamentario a participa recientemente na Panama, a obtene informacion importante y actualisa cu awo por contribui di forma valioso na fiha e rumbo di maneho cu ta hiba na Aruba, specificamente den e area di educacion. Entre e temanan cu a trata tabatin inteligencia artificial, e concepto di Scol Creativo y tambe e patronchinan di estudio awendia y nan efecto riba sociedad.
Fernandez-Acosta a forma parti di un delegacion di Parlamento, como miembro di e comision di educacion. Asina a reuni cu homologonan di diferente pais di Latino America kende a presenta un variedad di tema y estudio. “Tur topico unda por haya informacion relevante pa nos enseñansa y pa derecho di tur mucha na educacion (inclusividad), ta mas cu bon bini!” asina e parlamentario a expresa na su regreso.
Por ehempel, a conoce di e impacto di tecnologia riba decision, incluso e menasa potencial cu inteligencia artificial (AI) ta trece pa e capacidad humano unda ta mustra cu mester busca un balans, pa no laga e gran influencia di AI surpasa nos rol humano.
A mira e resultado di estudio y analisis riba con hende ta absorba conocemento segun edad y genero cu e obhetivo di compronde miho na cua edad mucha muhe of mucha homber ta absorba informacion miho y ki tipo di informacion, por ehempel, idioma. A resulta cu, contrario na locual tabata kere prome (te edad di 18 aña), e periodo optimal pa absorba conocemento por yega te edad di 25 aña.
Di otro banda, universidad rond mundo ta presentando un problematica caminda e studiantenan ta scoge un estudio segun nan comodidad y no segun e necesidad di e mercado laboral. Segun e parlamentario, mirando e situacion riba nos isla, esaki ta un area interesante pa tira bista den dje y mira con por motiva nos hobennan pa haci escogencia mas consciente.
Un tema cu sigur a capta atencion di Fernandez-Acosta tabata e concepto presenta pa Universidad di Barcelona di un asina yama “Escuela Creativo”. Esaki ta un scol caminda ta pone enfoke riba stimula creatividad como un metodo di enseñansa. E parlamentario a tuma contacto cu representante di e universidad pa wak con por intercambia idea y explora un plan pa Aruba cu ta balansa cu nos curriculum tradicional.
Den conclusion, tabata un biahe di trabou mas fructifero for di cual ta bin bek cu informacion, intercambio di idea y un red mas amplio di contacto, tur elemento cu pronto lo transmiti na e autoridadnan local y pusha iniciativa cu ta yuda eleva e nivel di enseñansa na Aruba
