Parlamentario di AVP, ing. Carlos Bermudez: Despues di shete aña awo si ta cumbini oposicion pa corda cu FCCA ta existi

ORANJESTAD (16 di mei 2025) – Despues di a tuma nota di publicacionnan e siman aki caminda ex minister di finansa di gabinete anterior I y II ta tilda e actual titular di finansas di a kita 19.7 miyon for di presupuesto cu tabata destina pa Fundacion di Cas pa Comunidad Arubano (FCCA), e Parlamentario di Partido di Pueblo Arubano (AVP), Carlos Bermudez a sinti e responsabilidad pa, un biaha mas, desmenti loke ta purba gaña e ciudadano cu ne.

E ex mandatario, kende actualmente ta den oposicion ta purba di sigui hunga e politikeria barata, mientras cu ta su gobierno, durante shete aña y mey, no a percura pa manda ni un florin den direccion di FCCA. Ainda dia 29 di augustus 2024, ora cu a entrega e presupuesto nacional 2025, no tabatin nada aloca pa construccion di vivienda social. Dia 11 di februari, y despues di a perde eleccion, a bin parlamento pa entrega un nota di cambio riba presupuesto y aki tampoco a destina fondo pa FCCA.

Tabata solamente dia 6 di maart, ora cu a mira cu e formacion di e gabinete nobo tabata evidente, cu el a hunga un strategia y presente un di dos nota di cambio den e presupuesto y a pone 17 miyon como prestamo y 2.7 miyon como subsidio pa FCCA. Pero den e shete aña y mey prome, nada!

Bermudez: “Awe e kier bin haci comosifuera e ta e bon samaritano y e gabinete actual AVP/FUTURO ta e boeman, cual ta un mentira. E politica bieu di gaña pueblo pa gana simpatia y voto nos tin cu caba cu ne. Nos tin cu informa pueblo manera debe ser.”

Si e mandatario aki a yuda FCCA sikiera cu 1 miyon pa aña, lo a yega e 8 miyon cu segun e a bay perdi na 2009; pero e no a move un dede. “Si bo tabata kier FCCA asina bon, si e ta na bo pecho, si bo kier a mira cas social construi; bo por a mira pa FCCA haya placa na 2024 of na 2023, pero nunca FCCA tabata den bo interes. Pasobra nos sa cu den shete aña y mey e gabinete anterior nunca a duna 1 florin na FCCA. Awe bo kier sali haci manera cu ta abo ta salbador di FCCA,” asina Carlos Bermudez a expresa.

Den programa di gobernacion AVP/FUTURO ta para cu lo sinta na mesa cu APFA pa yega na prestamo cu interesa abou pa FCCA. No solamente lo construi cas pa esunnan di menos recurso, pero lo ehecuta un vision mas amplio cu ta percura pa e bario ta bon ilumina, asfalta, cu luga pa mucha hunga y tereno pa hoben practica deporte, ademas di banki pa ciudadano por bin hunto y sinta combersa riba e progreso di e pais; e progreso cu pa shete aña y mey a anhela p’e y ni un dia e Gabinete anterior a realisa paso pa pidi FCCA pa sinta hunto y traha un plan pa yuda e pais aki.

Gabinete AVP-FUTURO y FCCA lo ta uno cu SI lo mustra su fruto pa nos comunidad.