Partido MEP : Mente destructor: Tur SECTOR cu MEP a pone briya, AVP y FUTURO kier kibra

Aruba a bin ta tuma nota di e mente destructor di e Gobierno nobo AVP FUTURO, un coalicion cu a cuminsa manca y ta sigui manca.

Ta parce cu e bol’i hilo n’ por cab’i desconopa!

Ta fresco den nos memoria cu cuanto arogancia Gerlien Croes a cuminsa negociacion pa un posibel formacion di gobernacion. Ta bibo den nos memoria con sumiso Mike Eman a acepta tur exigencia di Gerlien djis p’e por bira Minister President un biaha mas.

Pero pa nan a logra yega na un formacion, ambos lider a hiba un campaña di engaño y mentira.

Mike Eman a priminti di lo aumenta pension cu 700 florin hungando cu e sentimento di nos grandinan. Riba dje, ainda nos grandinan ta pagando pa remedi despues di a haya 250 so di aumento.

Gerlien Croes a priminti di lo haci tur cos diferente, profilando su mes como e diferencia den politica di Aruba. Cua diferencia? Cua cambio?

E dos nan aki, mane nan a sinta riba e stoel, a cuminsa cu purba destrui tur locual cu MEP a empodera y pone briya. Mas tristo ta, cu nan tin un rencor y odio incomparabel, cu no ta sano pa nos Pais.  Goberna cu envidia pasobra cu abo no por hacie miho, no ta sano pa niun hende.

Y ta hustamente pa e motibo aki cu pa AVP y FUTURO, tur sector cu ta briya ta un problema.

Enseñansa

Bou Endy Croes, Enseñansa a conoce paz y trankilidad.

Energia

Bou Glenbert Croes e sector a conoce un boom inigualabel, cu hasta e gran posibilidad di gas y petroleo den e subsuelonan di Aruba.

Social

Bou Rocco Tjon sector social a conoce hopi inversion empoderando e profesionalnan, despues cu bou di Glenbert Croes, a crea Crisisplan Social y a crea e red di proteccion pa nos muchanan.

AZV y SVB

Bou Dangui Oduber e instancianan aki a fortifica nan posicion financiero. Door di esaki por a aumenta pension gradualmente di un forma responsabel y elimina lista di remedinan cu nos pensionadonan mester paga.

Labor

Bou Glenbert Croes a aumenta salario minimo na 4 ocasion y a laga cla atras introduccion di salario minimo pa ora, cu AVP den Parlamento tin wanta den lachi. Cu su maneho di yiu di tera prome, MEP a salvaguardia trabou pa nos yiunan di tera cu termina nan estudio.

EPE

Glenbert Croes a haci e departamento aki nr 1 den cursonan cu ta cumpli cu demanda laboral y na prijs social.

Deporte

Nunca antes ningun gobierno a inverti asina tanto den deporte manera bou Endy Croes.

Pa loke ta Enseñansa, unico mensahe cu ta sali di Gerlien Croes su despacho ta cu tin hopi problema den e sector aki. Pero e no ta bisa kico! Pasobra no tin! Djis cu kier pone un luz negativo riba e pilar di nos sociedad.

Pa loke ta Social, Mervin Wyatt Ras a hasta lubida di paga bijstand p’e esnan den mas necesidad tirando culpa riba Financien.

Den area di Labor, Wendrick Cecilia y Arthur Dowers a dicidi di elimina DPL cu tin como tarea proteha trabou pa nos yiunan di tera.

Den e industria Energetico, unico cu ta sali for di AVP su boca ta corupcion y mas corupcion. Pero bo ta wak nan ta entrega keho? No! Nan ta hole gas y petroleo cu en bes di lag’e pa Aruba, ya a dicidi cu lo entrega esaki tambe na Hulanda mescos cu nos Aeropuerto. Y ainda falta.

Den AZV, ora MEP a laga atras e decision pa elimina e lista positivo pa nos pensionadonan, nan a cambia e decision. Ainda tin remedinan cu nos pensionadonan mester paga danki na decision di Mervin Wyatt Ras y Mike Eman

SVB cu ta encarga cu pago di pension a haya e opracht di Mike Eman pa aumenta esaki cu solamente 250 paso e 700 cu el a priminti den campaña tabata djis pa e por gana eleccion.

Awo Gerlien Croes ta cuestiona Enseñansa pa Empleo su derecho di existencia.

AWSS: Despues cu niun Gobierno a busca solucion p’e problema aki, MEP a busca y haya solucion, pa awe AVP ta boycotea esaki.

E briyo di tur sector gubernamental cu MEP a empodera, ta mane sumpiña den wowo di AVP y FUTURO cu simplemente kier destrui tur locual cu ta canando bon djis pasobra cu ta MEP a logr’e.

Cu Dios spaar nos dushi Aruba for di mentenan asina destructivo y vengativo.