Premier Eman di bishita na San Nicolas: Pensionado contento cu nan 250 florin

Prome Minister mr. Mike Eman diadomingo mainta despues di a atende misa a topa varios pensionado na San Nicolas. Den Chocolate City Restaurant a invita nos grandinan un delicioso brunch pa combersa riba algun tema cu merece di atencion. E mandatario a remarca cu tin hopi politico ta purba haya credito di e logro pa nos pensionado, pero nos tin di gradici señor todopoderoso p’e inspiracion y sabiduria cu a guia e proceso.

Parlamentario Otami Thomasia a acompaña Minister-President durante e bishita. E la remarca cu nos grandinan ta sinti e diferencia ora bay cumpra comestibel y paga nan recibonan di utilidad. Premier Eman ta di opinion cu Gabinete AVP-Futuro tin un compromiso pa haci un diferencia na nos grandinan cu pa hopi tempo a sirbi nos pais. Minister di Turismo, Transporte y Labor mr. Wendrick Cicilia y Chris James candidato di AVP pa San Nicolas tambe tabata presente pa combersa cu nos grandinan.

Logro tras di logro pa nos grandinan

Tabata inicio di siman riba dialuna cu Prome Minister a tene un reunion importante  cu presidente di Organisacion di Pensionado Publico Arubano (OPPA), sr. Ivo Valdes. Durante e encuentro a remarca cu mas di 19.000 pensionado di AOV (Algemene Ouderdomsverzekering of AOV) lo mira un aumento efectivo riba nan entrada mensual, den forma di reparatietoeslag. E aumento aki ta  representa un cambio substancial.

Diamars mr. Mike Eman den compania di Minister di Salud Publico drs. Mervin Wyatt-Ras y Director di AZV ir. Edwin Jacobs, aanuncia un logro crucial cu ta  demostra e compromiso firme di Gabinete AVP-FUTURO cu bienestar di pueblo. Entrante prome di mei, mayoria di  remedinan esencial ta haya bek sin gasto alguno. Esaki ta un alivio pa pueblo y sobre todo nos grandinan cu ya no mester paga mas pa remedi.

E prome pago di e aumento di 250 florin na reparatietoeslag a tuma luga 30 di april, un promesa concreto y cu ta cumpliendo cu ne relativamente lihe. Nos grandinan a compara e 250 florin actual cu e 30 florin cu a ricibi for di gobierno anterior, y ta optimista cu Gobierno AVP-Futuro lo cumpli cu e meta di un aumento total di 750 florin pa pensionado. Bishitanan manera na San Nicolas lo sigui den transcurso di e dianan venidero den otro bario.