Enviado Spesial Hulandes Edison Rijna, Ex-Gezaghebber di Bonaire, ta Malinformá CARICOM—Ta Sirbi Interés Hulandes, No Pueblo

Enviado Spesial Hulandes Edison Rijna, ex-gezaghebber di Bonaire, ta bai representá gobierno Hulandes na Global Sustainable Island Summit (GSIS) na St. Kitts i Nevis den mei 2025. Presentá komo un lobbyista pa mas finansiamiento pa Forum for Subnational Island Jurisdictions (SNIJs), su funshon real ta promovè interés stratégiko Hulandes. Su presensia ta pone na peliger desinformáshon di partnernan di CARICOM, ya ku e ta representá e estado kolonial—no bos di pueblo di teritorionan insular no soberano.

Ta importante pa klarifiká e akshonan di e asina-yama Enviado Spesial Hulandes ku ta interaktua ku CARICOM i St. Kitts i Nevis. Mientras ku e ta presentá su mes komo un representante di Bonaire, e realmenta ta sirbi interés Hulandes, no esunan di pueblo di Bonaire. E ta traha pa gobierno Hulandes, I no ta reflehá lucha of bos di poblashon lokal.

E narativo ku ta wordo promové ta desinformante i engañoso. E Enviado Spesial ta trata di sigurá finansiamiento bao di e disfraz di representá vulnerabilidat klimátiko i desafionan di Bonaire, pero e demandanan aki ta fundamentalmente kuestionabel. Bonaire no ta situá den e ruta o zona di orkan, i nos isla no ta sufri di desasternan natural grandi manera hopi otro paisnan den Karibe. Mientras ku kambio klimátiko ta un preokupashon global, e no ta e asuntu mas urgente ku ta afekta nos pueblo.

E krisis real na Bonaire no ta ambiental, sino un krisis di derechonan humano. Gobierno Hulandes ta imponé impuesto haltu i ta kolektá tur sin rendi kuenta na pueblo. Nos skolnan ta elemina nos identidad kulturál, forzando muchanan nativo den un sistema ku ta ignora i elemina su idioma i derechonan. Migrashon sin restrikshon for di Hulanda ta okashona sobrepoblashon riba Bonaire, ta pone preshon tenso riba infrastruktura, rekursonan i e struktura sosial—un ehempel ku no por skonde di eksplotashon kolonial moderno.

Salubridat na Bonaire ya no ta sirbi nos pueblo—ta wordu husá komo un instrumento di kontrol kolonial Hulandes. Imposishon forzá di ley Hulandes oropeo manera “eutanasia” ta viola nos balornan moral i kulturál, lagando famianan traumatizá i e grandinan ku miedo pa buska atenshon mediko. Desde su implementashon, tasa di morto a dobel, i nos poblashon nativo a disminuí di 80% den 2010 pa aproximadamente 30% awe. Esaki no ta un koinsidensia—ta un politika deliberá di desplazamentu i eliminashon di identidat kulturál.

Ta engañoso i dañino pa e Enviado aki pa presentá un narativo falsu na Karibe, desvia atenshon for di lucha real di Bonaire i reforzá dominashon kolonial Hulandes. 

Nos ta hasi yamada na lidernan di CARICOM i gobierno di St. Kitts i Nevis pa distingi entre un enviado Hulandes ku ta promové interés Hulandes i bos real di pueblo di Bonaire, ku ta luchá pa nan sobreviviensa, derechonan i autodeterminashon.