Ryçond do Nascimento:Gerlien ta hunga Tinker Bell: no kier madura ni tuma responsabilidad

Pa algun tempo caba tin desaroyonan politico cu ta pone mi corda riba Tinker Bell (Campanita). Tinker Bell ta e elf cu ta compaña Peter Pan cu no kier madura ni tuma responsabilidad. Tinker Bell ta un metafora pa un persona cu ta uza su encanto femenino y su intensidad travieso como parti central di su identidad, pero tin dificultad pa desaroya como profesional competente y madura como un persona cu por mantene stabilidad den relacionnan. E Pixie Dream Girl ta cla pa grita cu el a wordo humiya, como arma manipuladora pa sirbi su boluntad egoista.

Tinker Bell ta un desvio patologico di loke ta desaroyo normal di un mucha. Segun e psicologo Piaget e ta normal c’un mucha entre e edad di 2 pa 7 aña ta pensa egoisticamente, pasobra ainda nan no por compronde bon bon e consecuencianan di nan escogencianan. Pero, ora nan bira mas grandi ta importante pa nan siña bira serio y tuma responsabilidad pa nan actonan. Nan mester cuminsa tene cuenta cu nan tin impacto riba nan famia y nan comunidad.

Den cierto sentido Gerlien tin un parecido na Tinker Bell. El a squeeze Mike Eman poniendo pia abao pa haya Relacionnan di Reino pa su mes y finansa publico pa Geoffrey Wever. El a sapatia cu Desiree Croes no por bira Minister Plenipotenciario y e tabata kier pa e Gabinete haya e nomber Eman-Croes.

Pero, mientras cu Gerlien kier saca maximo probecho, e ta nenga di asumi e responsabilidadnan cu mester acompaña su aumento di poder. Un di e responsabilidadnan ey ta pa informa pueblo debidamente y no gaña deliberadamente. Bo ta corda con Gerlien a bisa cu ta existi base legal pa staatssecretaris? Esey tabata puro mentira, pasobra nos derecho constitucional no conoce nombracion di staatssecretaris.

Por ta bo ta bisa cu esey tabata solamente un incidente isola. Awel, laga mi duna un otro ehempel: poco dia pasa Gerlien a bisa Brian Koolman cu, despues cu Gerlien a bira minister, e no ta responsabel mas pa e formacion. Loke e ta bisa ta cu una bes cu el a yega na poder, tur su responsabilidad a termina. Gerlien obviamente a pega soño na universidad ora cu e docente a trata e responsabilidad di e minister pa e formacion y muy en particular e responsabilidad di e ministernan cu tabata encarga cu e formacion. Ademas e ta supose di ta obvio cu ta e minister ta carga e responsabilidad aki, pasobra ta solamente e minister Parlamento por disciplina cu un mocion di desconfiansa pa motibo di actuacion incorecto durante e proceso di formacion.

Pero e entrevista cortico di Brian tin mucho mas Pixie Dust. Pa duna bo otro ehempel. Gerlien a bisa Brian cu e no tin influencia riba ken AVP ta scohe como minister. Pero esey tambe ta mentira, pasobra Gerlien mes a sapatia ora Mike kier a apunta Desiree como Minister Plenipotenciario. Ta Gerlien a obliga Mike busca un otro persona y ta p’esey Mike a acerca Baba Herdé pa e puesto.

E falta di madures aki ta haci cu Gerlien ta schuif tur responsabilidad cu segun derecho constitucional ta mara na e cartera di Relacionnan di Reino. Djis wak riba e Facebook page di Parlamento e encuentro publico di dia 29 di april 2025 encuanto e Rijkswet di supervision financiero. Gerlien a literalmente tuma su tempo pa fabrica un “timeline” consistiendo di momentonan cu Evelyn Wever-Croes tabatin palabracionnan cu Hulanda, mientras cu Gerlien a laga henter e contexto di e negociacionnan cu Hulanda afo. Tacticamente el a manipula informacion pa evita cu su siguidonan por compronde e materia debidamente.

Asina Gerlien a crea e storia cu e Rijkswet di supervision financiero y e interes di 6,9% tin un solo responsabel: Evelyn Wever-Croes. Pio ta cu yen profesional mentepollo ta cay pa su bruheria, siguiendo ciegamente medio berdadnan cu ta cubri su gran mentira. Dicon Gerlien no por duna un presentacion madura, splicando e tres punto esencial di un analisis honesto:

1.        cu berdad Evelyn a tuma varios decision durante reunionnan cu Hulanda encuanto e cuestion di Rijkswet di supervision financiero.

2.        cu e ta un realidad cu Gabinetenan Mike Eman I y II a provoca Hulanda pa interveni den nos autonomia. Esey tabata suficiente, sin tin mester di splica adicionalmente cu ta e deficitnan structural di alrededor di 300 miyon pa aña di AVP a pone Hulanda pensa cu supervision financiero externo di CAft ta e unico garantia pa un maneho financiero serio na Aruba.

3.        Pero, honor a la verdad, tampoco ta husto pa pone henter e carga aki riba schouder di Mike Eman so. Tin un otro realidad cu nos mester adresa. E realidad cu Hulanda a chantagia Aruba uzando prestamo di likides durante di un pandemia pa impone e Rijkswet, CHE/COHO/TWO y landspakket.

Enfin, e minister di Relacionnan den Reino, Gerlien Croes, cu e minister di Finansa, Geoffrey Wever, mester a asumi responsabilidad segun nos derecho constitucional. E luga pa nan haci esey tabata den parlamento. Pero, Gerlien a opta pa schuif responsabilidad. 

Mientras tanto Gerlien mes ta invalida loke e hunto cu Geoffrey y Mike Eman a percura pa hinca den nan programa di gobernacion. Segun e programa nos democracia parlamentario merece prioridad. Gerlien ta supose di sa cu responsabilidad ministerial ta un norma central den nos Constitucion, cu ta garantisa cu nos tin un sistema parlamentario. E responsabilidad aki no ta tuma un break ora tin cambio di poder: e responsabilidad ta conta pa e funcion di minister sin importa ken ta e persona cu ta carga e funcion. Toch Gerlien kier strooi cu Pixie Dust riba dje, comosifuera cu e encanto aki ta mas importante cu nos leynan.

Esey ta politikeria infantil cu ta demostra egoismo, manipulacion y deshonestidad. Esun cu tin su wowonan habri ta mira Gerlien su incompetencia y ineptitud cla cla. Pasobra, un politica madura ta exigi cu esun cu kier acepta e posicion di prestigio di minister, tambe mester ta dispuesto pa tuma e manto di responsabilidad. Pa nos como pueblo ta keda e les importante cu no ta suficiente cu un minister ta popular, e mester ta capaz. Aruba mester exigi madurez. Pasobra puro ambicion sin cerebro simplemente no ta suficiente