Minister Xiomara Maduro ta invita pa sintonisa e programa informativo ‘Papiamento: herencia cultural di sclavitud’ – Prome parti

Presenta pa e linguista y traductor sr. Ramon Todd Dandaré

Minister di Cultura Xiomara Maduro ta informa cu na vispera di e conmemoracion di 160 aña di abolicion di sclavitud den Reino Hulandes, Ministerio di Cultura ta presenta un otro programa informativo ‘Papiamento: herencia cultural di sclavitud’ den cuadro di un serie di programa pa informa comunidad riba historia di sclavitud di nos Pais.

E programa ‘Papiamento: herencia cultural di sclavitud’ ta consisti di dos parti. Den e prome parti e linguista y traductor, sr. Ramon Todd Dandaré lo comparti informacion tocante con catibonan a yega na nos Pais Aruba, lo conta tocante e origen di idioma Papiamento, efectonan y resultado di colonialismo na Aruba y hopi otro informacion importante mas.

E prome parti di e programa ‘Papiamento: herencia cultural di sclavitud’, lo pasa dialuna awor dia 26 di juni pa 7’or di anochi na Telearuba y diamars dia 27 di juni pa 8’or di anochi na Diario tv. Minister Maduro ta extende un invitacion pa sintonisa e programa aki cu tin informacion importante tocante di nos idioma papiamento y sclavitud na Aruba.