Hulanda ta firma acuerdo cu Aruba y Sint Maarten tocante cooperacion riba tereno di energia sostenibel

Hulanda ta bay reforsa e cooperacion cu Aruba y Sint Maarten riba tereno di energia renovable. Asina e paisnan a acorda awe durante e prome Caribbean Climate and Energy Conference (CCEC), cu ta tumando luga di 10 te cu 12 di mei na Aruba.

Un grupo amplio di organisacion, isla y pais di tanto Caribe como di otro parti lo ta presente na CCEC. Cu e conferencia aki Hulanda y Aruba kier promove cooperacion pa loke ta trata accion di clima entre islanan chikito rond mundo. Ehempelnan di temanan cu ta ser discuti ta un transicion di energia inclusivo y financiamento di tur e plannan.

Hulanda durante e conferencia lo firma un asina yama Memorandum of Understanding (MoU) cu tantu Sint Maarten como Aruba. E cooperacion ta enfoca riba diferente tecnologia di energia renovable, manera energia di biento, hidrogeno berde, energia solar y almacenamento di energia. Den e acuerdo a haci palabracionnan tocante intercambio di personal y conocemento cientifico y tecnologico y organisacion di por ehempel gruponan di trabao y proyectonan di investigacion conhuntamente.

Minister pa Clima y Energía, Rob Jetten: “E islanan ya caba ta den e prome liña di cambio di clima. Si nos no actua e consecuencianan ta bira mas grandi y kisas te hasta irevocabel. P’esey gabinete kier sigura cu islanan manera Aruba y Sint Maarten no ta keda atras den e transicion. Esey tambe ta husticia di clima pa mi.”

Prome minister di Aruba, Evelyn Wever-Croes: “Aruba ta recuperando for di e pandemia di Covid-19 cu un economia mas fuerte y resiliente. Den cuadro di esaki energia lo bira un pilar economico importante. Tin hopi oportunidad pa Aruba mes, pero tambe oportunidadnan como pais hunto den Reino. E MoU cu a firma ta un paso importante den e direccion ey, paso si kier pa bin cambio berdadero, hunto mester haci e esfuersonan.”

Prome minister di Sint Maarten, Silveria Jacobs: “Si mi discusionan anterior y mi trabou di lobby a resulta den algun idea, ta cu ta di gran importancia pa Sint Maarten ta parti di e combersacionnan cu ta trata energia berde y desaroyo sostenibel pa nos isla. Cu e firmamento di e MoU aki nos ta cla pa hasi gran pasonan pa sostenibilidad y e tan spera transicion di energia cu Sint Maarten tin den mente.”