Leonardo Figaroa: Continuando den Politica, representando e simbolodi un politica moderno
Aruba mi kier anuncia na abo cu entrante 8 di maart 2023, bo tin un organisacion
politico nobo. E ultimo lunanan tabata un periodo dificil pami, pa motibo di e perdida
dimi kerida mama. Despues di esaki, mi mester a puntra mi mes con mi ta sigi awo?
Sigi cumi plannan of pone nan na banda unrato? Mi contesta tabata sigi, cu e
determinacion pa mi sirbi mi pais. Mi sa cu mi por sirbi mi pais solamente riba un
partido cu tin idealnan social liberal-progressivo, enfokando riba brinda hobenan y e
siguiente generacion cu un espacio pa por sinta na e mesa rondo. Aruba mi trabao ta
cuminsa, e caminda pa mi por haci realidad e vision cu mi tin pa Aruba. Mi kier brinda e
solucion y e sentimiento di seguridad pa e hobenan studiante, clase trahado y
pensionadonan. Mi vision ta basa ariba crea mas lidernan, stimula participacion y crea
un espacio pa pueblo por connecta bek cu politica. Mi kier Aruba por forma parti di e
dialogo, pa por yuda crea un vision cu perspectivanan nobo.
Aruba mester vision nobo!
Mi ta kere firmemente cu e solucionan cu Aruba tin mester solamente e generacion cu
un vision nobo por contribui na crea esakinan. Durante e ultimo 23 añanan nos a brinda
espacio na AVP & MEP pa por dirigi nos pais, lastimamente ambos su resultadonan no
ta mucho distincto. Awe tin un pobresa nobo ta reina, e clase medio a disaparece, nos
sistema di salubridad publico no por carga tur e retonan y nos enseñansa mester
perspectiva nobo pa por brinda e lidernan den desaroyo un curriculum riba nivel di siglo
- Unda esaki lo crea un connection entre e suministro academico y nos mercado
laboral. Mi kier mira un gobierno cu un plan proactivo riba e tema di medio ambiente.
Nos Dump y sistema di desperdicio di sushi ta sclama pa un solucion concreto.
Durante mi 18 luna di reflexion mi a usa e tempo pa pensa riba e consehonan cu mi a
recibi di mi votadornan. Paso cada un comentario mi ta tuma den consideracion y cada
un comentario tin un balor. Mi a haci caso nami votadornan y a accepta cu Accion21 no
tabata e organisacion politico cu ta pas cu mi idealnan mas. Pero awe mi kier enfoka
ariba e futuro y cual impacto mi kier laga atras pa Aruba. Mi ta kere cu nos gobierno
falta vision y tambe direccion pa por yuda e cuidadano. Mi kier contribui na un politica
nobo, misa cu hopi hende ta sinti nan mes desconecta, principalmente den nos sistema
politico pero mi kier traha incansabelmente pa demonstra Aruba cu e futuro generacion
si kier hiba un politica basa riba contenido y compromiso qualitativo pa alcansa e miho
solucionan pa nos tur.
Kico ta haci mi partido diferente?
Primeramente mi escogencia di e estilo pa lidera e partido. Mi ta opta pa duna e poder
bek na cada miembro di nos organisacion politico. Na final di dia un partido politico tin
como entidad juridico e status di un “asociacion”. Nos kier pa miembronan por participa
den e dialogo, vota riba tur proposicion cu nos partijraad ta trece dilanti y traha duro pa
duna contenido na nos meta. Mi kier crea lidernan, mi ta kere cu cada individuo tin un
cualidad. Mi ta kere cu tur cuidadano di pais Aruba ta suficiente inteligente pa por ricibi
tur e informacion y por forma parti di un forma constructivo na e dialogo, pa hunto nos
crea un programa di partido cu como punto di salida ta: solucion.
Segundamente, mi kier hiba un campaña cu tin como punto di salida: principionan di
nos organisacion politico. Mi kier crea un forum politico unda hunto abo como miembro
por participa, cuestiona, wordo informa y educa bo mes pa asina abo por compronde e
topiconan y vota conscientemente.
Finalmente, mi kier gradici tur e personanan cu semper a sa di sostenemi. Awe mi ta
haci un peticion na abo pa un biaha mas forma parti di e vision pa crea mas lider, pa
connecta e progreso. Mi kier drenta den dialogo cubo Aruba, mi kier scucha tur e
retonan cu abo ta enfrentando diariamente, mi kier brindabo cu e oportunidad pa bo
comparti cu nos tur e retonan ey. Pa na final hunto cu bo crea un programma di partido
cu bo por ta orguyoso di dje pa asina nos por bay e eleccion y causa un impacto pa
drenta den e proximo gobernacion.
Aruba esaki ta bo opportunidad pa forma parti di forum, unda intercambio di
pensamento, dialogo y debate lo resulta den solucionan concreto. Nos ta un forum
politico, mas cu un plataforma politico. PdP ta deriva for di e punto di salida cu nos kier
traha pa Aruba, e interes y bienestar general mester prevalece.
Aruba ban hunto crea un dirrecion nobo, crea lidernan y conecta cu otro, paso e
comentarionan constructivo ta primordial pa nos. Ami, Leonardo Figaroa ta spera di por
conta cubo.