E futuro di Cyber Security – For di e perspectiva di un Hacker
Bo ta cla pa haya sa tur cos over cyber security? Si bo ta interesa den e topico di cyber security, bo tin e oportunidad pa atende un conferencia cu un top speaker riba e topico aki. Keren Elezari, ‘The Friendly Hacker’, lo ta na Aruba y Curaçao pa asina profundisa riba e topico di cyber security. E conferencia ‘The future of Cyber Security. From a Hacker’s Perspective’ lo tuma lugar na Aruba diamars 18 di April y na Curaçao diaranson 19 di April.
Keren Elezari ta un dama cu ta internacionalmente renombra pa su conocimento riba e topico di seguridad cibernetico. Keren Elezari ta un ‘White Hat Hacker’, pues un hacker cu ta uza su talentonan pero pa yuda proteha y mehora e seguridad cibernetico den bo compania. Keren Elezari ta hack for di tempo cu e tin 12 aña y awendia e ta un security analist cu a traha cu companianan grandi di seguridad na entre otro Israel y tambe cu companianan cu ta cay den categoria di Big 4 y Fortune 500. E ta traha tambe como consehero strategico pa companianan internacional renombra riba tereno di tecnologia y tambe start-ups inovativo. Na 2014 Keren Elezari a bira prome hende muher Israeli pa tene un charla den un TED Conference.
Aaron Antersijn kende ta Cyber Security Awareness Specialist na Cyber Security Dutch Caribbean y ta e motor tras di e conferencia aki, ta splica cu ta importante pa nos tur ta conciente cu cyber security ta regarda nos tur. Durante e conferencia lo tin mas orador. Un di nan ta Paul Eelens kende ta un Information Security Expert y e lo papia e.o. di e formanan con bo por proteha bo mes contra un atake cibernetico. Cyber Security ta pa tur hende cu ta maneha informacion balioso y confidencial y cu ta informacion cu si e cay den e mannan robes, hende por haci mal uzo di dje y e por causa hopi daño na bo compania pero tambe na henter un pais.
Un punto importante pa menciona ta cu e conferencia no ta solamente pa personanan cu ta traha den IT of Cyber Security, pero ta pa tur persona cu tin un trabou responsabel y cu ta
traha diariamente cu computer, cu ta maneha informacion valioso, cu ta haci uzo telefon pa handle cos di trabou, cu ta traha for di cas, ta uza internet publico pa manda email etc. Atende e conferencia pa bo haya sa con vulnerabel bo ta y tambe haya sa con tur dia mas y mas hende ta wordo gehacked. Hacking ta e peliger #3 awor aki na mundo, despues di Horcan y Tsunami, cu por haci daño miyonario ariba negoshi, infrastructura y asta por paralisa un pais completo…dus bin scucha bo mes kico abo por haci pa no bira victima of ta esun cu a wordo uza pa hack.
E conferencia ‘The future of Cyber Security. From a Hacker’s Perspective’ ta tuma lugar dia 18 di april den Aruba Marriott Resort Grand Ballroom, cuminsando pa 2pm te cu 6.30pm. Na Curaçao e conferencia ta tuma lugar dia 19 di april den Curaçao Marriott Resort Grand Ballroom, cuminsando di 2pm te cu 6.30pm.
Si bo kier sigura bo presencia na e conferencia aki cu un orador di taya y renombre internacional riba e topico di Cyber Security y Hacking, bo por registra y cumpra bo ticket online via www.cybersecuritydutchcaribbean.com
Prijs di Early Bird ta 195 dollar pa persona te cu 5 di april. Despues di 5 di april e prijs ta bira 250 dollar pa persona. E prijs ta inclui un Premium Bar Network Hour. Tur informacion y con pa bo cumpra bo caarchi ta riba www.cybersecuritydutchcaribbean.com