Parlamentario Ricky Hoek (MEP): Ampliando frontera cu British Airways

Diadomingo, pa 5’or di atardi cu hopi entusiasmo pueblo di Aruba tabata warda e yegada di British Airways. Esaki tabata e prome biahe oficial cu British Airways a haci pa Aruba. E vuelo inaugural aki a sali for di aeropuerto di Gatwick na London, Gran Bretaña cu un escala na Antigua y djey pa Aruba.

E buelonan di British Airways lo ta dos biaha pa siman y primordialmente for di Gran Bretaña. Naturalmente tin bishitante di otro parti di Europa cu lo haci uso di e conexion aki pa yega Aruba. Di otro banda, esaki ta un bon oportunidad pa nos di Aruba tambe haci un bishita na Gran Bretaña y otro paisnan den Europa cu e conexion aki di British Airways.

Diversificacion den turismo

Cu e yegada di e flota di British Airways esaki ta contribui na e diversificacion di nos turismo. ATA den su conferencia di 27 di september ultimo a indica cu lo bay implementa nan strategia di diversificacion pa nos turismo. E strategia aki ta encera tambe e atraccion di turistanan di ‘high value’. E strategia aki ta enfoca riba paisnan Europeo manera Gran Bretaña, Alemania, Italia, Belgica y Suiza. Aunke cu e mercado ingles ta e di dos mas grandi cu ta bin for di Europa, awor tin conexion directo cu Aruba. Di e forma aki e prome paso di e strategia a keda realisa y ta haci cu e oportunidad pa hopi mas Ingles bin Aruba lo crece exponencialmente. 

Aporte na nos economia

Cu e strategia menciona ariba, lo explora den e paisnan aki pa e personanan cu un entrada halto of cu ta riba e promedio salarial y asina atrae nan pa bin bishita Aruba. E turistanan ‘high value’ aki lo por keda un poco mas largo na nos isla y tambe lo gasta un poco mas tambe mirando nan entrada. Alabes, mirando e moneda di e paisnan aki, cu ta pounds, euro y e franc suizo, cu tin un balor halto, e turistanan di dicho paisnan lo gasta mas riba nos isla. E strategia di diversificacion aki ta aporta tambe na engrandece nos economia y asina haci tambe cu Aruba su situacion financiero lo mehora un poco mas.

Bon bini na British Airways y un pabien na e ekipo di ATA, Minister Dangui Oduber, Gabinete Wever Croes II y pueblo di Aruba cu e logro grandi aki cu un aerolinea di caliber mas riba nos isla.