Category: Gobierno

Awe Directie Ouderenzaken a organisa un charla informativo pa celebra Luna di Adulto Mayor. E charla a toca e tema di e situacion financiero di adulto mayor na Aruba. Jonathan Upegui di Central Bureau of Statistics Aruba, Maritza Krozendijk di RBC Royal Bank y Wilbert Marchena di Departamento di Asunto Social a duna un splicacion y a contesta preguntanan di e publico. Directie Ouderenzaken ta gradici e panelistanan y nos moderador Edward Erasmus pa un tremendo presentacion. Ademas un palabra di danki na OPPA Aruba pa uzo di nan facilidad. Directie Ouderenzaken conhuntamente cu CBS lo sigui organisa charla informativo pa asina stimula participacion den luna di oktober.

Dia 30 di september ultimo Minister Maduro a anuncia e ‘Plan di Impuesto 2023’ cu tin como meta pa yega na un sistema fiscal mas simpel y husto. E plan ta encera e recuperacion di Aruba su finansa publico por medio di compensacion, reparticion husto y mehoracion di cumplimento di impuesto di ciudadano y bishitante. Mas concreto e ‘Plan di Impuesto 2023’ lo conta cu introduccion di un tarifa nobo di BBO cu ta resulta den un tarifa combina di BBO, BAVP y BAZV di 7%, hunto cu un pakete di compensacion pa individual y negoshi pa yuda mitiga e efectonan di inflacion. E pakete di compensacion individual ta conta cu un rebaho di 2% riba impuesto di entrada, lo subi e suma liber di impuesto na 30.000 mil florin, lo separa e cobransa di impuesto riba entrada pa pensionado, y lo hisa e ‘reparatietoeslag’ pa pensionado di SVb cu 45 florin.

ORANJESTAD – Siman pasa Minister di Enseñansa y Deporte Endy Croes tabata presente na e ceremonia pa cu e desvelo di e di #103 KLM Delft Blue House. Na e ocasion special aki Gobernador Suplente sr. Agustin Vrolijk, Presidente di Parlamento sr Edgar Vrolijk,Prome Minister Evelyn Wever-Croes y demas coleganan Minister y Parlamentarionan y tur invitadonan y alto ehecutivonan di KLM presente por a gosa di e celebracion aki. Un bunita ceremonia cu a tuma luga na e Museo Arkeologico di Aruba. For di yegada caba por a aprecia tur locual a wordo prepara pa e gran celebracion di 103 aña di KLM e parha blauw y manteniendo Aruba su tradicion y cultura semper na halto.

ORANJESTAD – Dialuna anochi, durante un momento sumamente importante, Minister di Husticia y Asuntonan Social Sr. Rocco Tjon hunto cu coleganan Minister President Sra. Evelyn Wever-Croes, Minister di Enseñansa y Deporte Sr. Endy Croes y Minister di Transporte, Integridad, Naturalesa y Cuido di Grandinan Sr. Ursell Arends, como tambe CEDE Aruba y e directiva di tur e Centronan di Bario a firma e “Memorandum of Understanding” (MOU) pa asina realisa e ehecucion di e proyecto di Veilige Barios.

Na aña 2011, despues cu Nel Oduber a dicidi di bandona politica, partido MEP a tene un eleccion pa lider, y Congreso 2011 a eligi Evelyn Wever-Croes como Lider di MEP.
Na aña 2015 a re-eligi Evelyn Wever-Croes durante e Congreso 2015.
Despues di un tardansa ocasiona pa e pandemia di Covid-19, Partido MEP lo propone na su Congreso un biaha mas pa re- eligi Evelyn Wever-Croes como Lider di MEP pa e siguiente 4 añanan

Den november, Dienst Uitvoering Onderwijs (DUO) lo bishita Aruba, Boneiro, Corsou y Sint Maarten di nobo. DUO ta habri un oficina di servicio temporal na e islanan aki pa papia cu futuro studiante y ex­studiante. Ademas, DUO ta organisa tambe reunion informativo y ofrece ayudo na midi eynan mes den caso di problema cu pago. Esaki ta un continuacion di e bishita exitoso di DUO na Caribe na fin di aña pasa y durante luna di maart pa juni.

ORANJESTAD – Den cuadro di conscientisacion di “Dia Mundial di Salud Mental”, 10 di october, Prome Minister Evelyn Wever – Croes a bisti na biña pa trece conscientisacion na e tema di salud mental. Prome Minister a expresa algun recomendacion tocante e tema aki enfatisando e importancia pa cada persona busca su mesun paz mental of busca ayudo.

Oranjestad: Siman pasa den cuadro di e siman di conscientisacion di Dislexia, Fundacion Pro Persona cu Dislexia a haci un bishita di cortesia na Minister Endy Croes. Presente na e reunion aki tabata sra Eveline Arends cu ta Presidente di e fundacion,sra Roraima Dubero, secretario y sra Ivy Goeloe cu ta bestuurslid. E fundacion aki a lanta na aña februari di aña 2013,cu e meta pa yuda personanan cu mester di esaki.Kicko ta Dislexia? Esaki ta un trastorno den celebro cu ta haci dificil pa siña lesa y skirbi cu precision y fluidez.Esaki ta un condicion pa bida largo, muchanan no ta supera Dislexia pero cu e apoyo adecua, e habilidad nan clave por wordo mehora.Hopi personanan exitoso tin Dislexia y investigadornan continuamente ta studiando dislexia pa mas di un siglo. Mester agrega cu Minister Endy Croes a skucha cu hopi atencion tur e puntonan treci dilanti pa e fundacion Pro Persona cu Dislexia, y sigur lo sondea tur posibilidadnan cu ta existi pa mas sosten y colaboracion di parti Gobierno pa di e forma aki por yuda trece tur informacion y ayudo pa personanan cu Dislexia mas cerca di e comunidad.Minsiter Endy Croes a gradici fundacion Pro Persona cu Dislexia pa e bishita aki.