Nos t'ey pa Informa bo
Secretario General di MEP a splica di ta siguiendo e caso Avestruz hopi di serca y e siman aki e caso lo continua den corte dilanti mesa berde. Hopi interesante pa scucha e preguntanan di Hues na e malhechornan amigonan di serca di Benny y AVP kendenan a hasi negoshinan miyonario cu tereno y patrimonio di pueblo.
Riba nivel di gobierno Minister President y su gabinete a demostra di tin un vision progresivo pa cumpli cu loke ta necesario pa Aruba y ta ehecutando esaki. Parlamento Hulandes tambe ta mira e esfuersonan di Aruba. Durante mi bishita di trabou na Hulanda mi a reuni cu Parlamentario Roelien Kamminga riba e topico aki. Sra. Kamminga ta miembro di partido VVD cu ta un di e partidonan mas critico pa cu e desaroyonan den Caribe. Mi ta contento cu sra. Kamminga tambe ta mira cu Aruba ‘langzaam maar zeker’ ta recuperando di e crisis mundial, mientras ta haciendo su aparato publico mas efectivo. Esaki sigur a yuda cu Aruba no a haya e aanwijzing.
Diaranson 19 di october como Lider di Fraccion di MEP Shailiny Tromp-Lee a participa na e congreso di Sociaal Economische Raad (SER) en conexion cu nan celebracion di 35 aña di existencia. E congreso tabatin como nomber: ‘Dynamiek Tripartiet Social Dialoog binnen Sociaal Economische Raden’.
Mescos cu Turismo ta kibrando tur record desde April, asina tambe Banco Central di Aruba a indica cu pa di dos trimester consecutivo nos economia a crece y e biaha aki cu 5.7% compara cu e mesun periodo di 2021. “E crecemento di 5,7 porciento den Producto Bruto Domestico (PBD) real a deriva for di e impulso positivo continuo den e sector turistico. Indicadornan di inversion y consumo a demostra un expansion den actividad economico.”
Recientemente mi a wak AVP a manda su parlamentarionan di atake bay den prensa pa un biaha mas tira Aruba completo bao bus. Aparentemente e parlamentario aki tin informacion cu Hulanda no kier duna Aruba un KB pa gobierno su mal maneho. Ora bo scucha e tipo di declaracionan asina bo tin di cuminsa hari. Si enberdad Aruba no haya un KB ta pa su esfuerso y un bon maneho cu Hulanda lo a dicidi di no duna KB mas. Pa lunanan largo AVP a sinta gaña cu maneho di gobierno ta malo y cu ta merece un KB. Mike Eman ta decepciona cu Aruba no ta bay haya un KB. Ami no sa unda nan a haya e informacion aki pasobra ta te Diabierna Hulanda lo comunica cu gobierno si Aruba ta haya un KB of no.
Diamars ultimo dia 18 di oktober 2022, dia nacional contra traficacion di hende, mi a asisti na lansamento di e pakete educativo riba e topico di traficacion hende. Un pakete special pa studiantenan di scol secundario di 12 pa 18 aña. Manera cu a keda accentua durante e atardi aki, na Aruba tambe nos tin casonan di ‘mensensmokkel y mensenhandel’ y pesey mes nos mester duna e topiconan aki su debido atencion. E pakete ta forma parti di e campaña ‘Habri bo wowo’, cu a inicia na 2021 y cu nos por sigui via www.habribowowo.com, rednan social (Facebook, Instagram), radio y corant.
Parlamento ta preparando pa trata presupuesto y esaki ta trece cu n’e un gran trabou. Di bishita na departamentonan te cu reunionnan cu directornan y controla e presupuesto riba su mes. Nos fraccion a manda riba 400 pregunta pa Gobierno caba den e tempo cu a wordo stipula pa haci esaki y awor ta sigi cu tramitenan practico pa por keda cla prome cu e reunionnan wordo poni riba agenda. Simultaneamente bo ta haya otro topiconan importante di nos pais cu tin cu wordo atendi y semper nos ta haci e maximo esfuerso pa atende cu tur lo mihor den nos abilidad.
Diabierna 14 di October 2022, na club huis di SV Juventud Tankileendert, a tuma lugar un anochi special pa duna homenahe na e hungadornan y directiva di e ekipo cu na 1998 a coi campeon di Division Prome. E ekipo aki a logra promove pa Hoofd Klas di AVB pa prome biaha den su historia. Tabata un anochi hopi special y ameno pa tur esnan presente cu tabata tin hopi tempo sin wak otro. JTL a keda varios aña hungando den Hoofdklas despues di e logro grandi aki.
Na momento cu pueblo a haya su recibo di awa y coriente luna cu a pasa, por bisa cu e recibonan aki, no ta gaña ya cu nan ta mustra e realidad di prijs di awa y coriente na Aruba. Parlamentario pa fraccion di AVP, Ryçond Santos do Nascimento a mustra cu e prijsnan aki tambe tin su impacto directo riba tur otro aspecto di bida di ciudadanonan: “E ta un realidad di bida y esaki no tabata algo cu nos mester a pasa dor di dje. Esaki ta resultado di mal maneho y locual Pueblo por a mira di parti di Minister Glenbert Croes, como mandatario di MEP y di e gobierno actual, ta simplemente un desaster.
Prome y durante nos entrada di MEP como politiconan nobo nos a wordo instrui cu e plataforma ta pone enfasis riba transparencia, integridad y virtudnan moral importante. Alaves nos a wordo informa cu si toch nos ta dicidi pa desvia di e norma y balornan aki, y cualkier persona hay’e den problema cu husticia pa via di esaki, esakinan lo mester sinta riba nan mesun blaar. Algo cu sigur ami ta kere den dje y ta para pe. Ta pesey ora cu informacionnan a cuminsa drenta cu algo no ta bon na Aruba Huis, Minister President Evelyn Wever-Croes a dicidi di habri un investigacion mesora. Esaki a wordo informa na Parlamento y ta algo cu a wordo comunica publicamente, pasobra nos partido no ta para pa nada cu ta atacha integridad ni bon gobernacion. E ta e seriedad aki cu ta haci cu mi por papia y skirbi di e investigacion aki pasobra transparencia y integridad semper lo keda un prioridad pa nos fraccion.
This will close in 0 seconds
This will close in 0 seconds
