Oranjestad, Aruba – Ayera mainta, Minister di Finansa, Asunto Economico y Sector Primario, mr. Geoffrey Wever, a habri e Prome Investment Conference, cual a forma parti di e 21st EU-OCT Forum cu a tuma luga na Aruba.


E OCT-EU Investment Conference a convoca e Overseas Countries and Territories (OCT’s), Union Europeo y representantenan di Hulanda, Francia y Dinamarka cu e meta pa fortalece dialogo, collaboracion, y traha riba retonan y solucionnan comun. E aña aki, e forum a culmina cu su prome Investment Conference, teni e ultimo dia di e programa — un momento historico pa e territorionan involucra. Den e contexto global actual di geopolitica y geoeconomia, cual ta afecta tur nos islanan y territorionan, e participacion den Global Gateway ta representa un señal fuerte di e Union Europeo tocante e evolucion di e relacion cu e OCT’s, y e potencial cu esaki ta trece den varios area strategico, manera; conectividad maritimo, conectividad digital, energia, maneho di crisis y di desaster y maneho di e reto comun di sargassum.


Hunto, e OCT’s ta representa 13 territorionan den Caribe, Pacifico y Artico, cubriendo un area maritimo enorme, ecosistemanan unico di biodiversidad di gran balor, y un riqueza cultural y social significativo pa nan pueblo y pa mundo. Participacion den e Global Gateway programma ta crea un opportunidad nobo pa fondo publico di Union Europeo, fondonan nacional y inversion priva pa proyectonan grandi cu impacto.


Un di e retonan mas grandi cu e OCT’s ta enfrenta, ta acceso na fondo pa realiza proyectonan di impacto E obhetivo di e conferencia aki ta reuni actornan di sector priva, institucionnan di Union Europeo y institucionnan financiero di desaroyo pa defini prioridadnan di inversion, conecta partnernan, y pa transforma proyectonan den accion concreto—permitiendo acceso na mas fondo pa crea y realiza proyectonan cu tin impacto real den comunidadnan.

Esaki ta alinea cu direccion strategico nobo di gobierno di Aruba pa diversifica su modelo di inversion, den cuadro cu su disciplina fiscal, incluyendo e desaroyo di un fondo publico multi-anual pa inversion. Recientemente, Aruba a logra e credit rating mas halto te awor, un rating di ‘A-’ di Standard & Poor’s, fortaleciendo su posicion den mercado internacional.


E potencial pa colaboracion regional entre OCT’s ta inmenso. Hunto, e Union Europeo, Estado Miembronan y OCT’s por navega oportunidadnan di financiamiento, ofrece apoyo regulatorio, y desaroya iniciativanan regional cu por aborda retonan estructural comparti mientras ta impulsá innovacion y emprendemento.


Minister Wever ta gradici y felicita Comision di Union Europeo, asociacion di OCTA, GOPA, team Aruba, studiantenan di UA pa nan apoyo den e organisacion di e Conferencia como tambe tur participante cu a contribui pa e confrerencia por tabata exitoso. Finalmente, alabes Minister Wever a expresa su gratitud na Comision di Union Europeo pa habri e porta pa e OCT nan pa participa activamente den e iniciativa di Global Gateway creando oportunidadnan nobo pa e teritorionan.