Gobierno di Aruba ta continua cu e iniciativa “Baki den Bario”, un proyecto enfoca riba mehora e limpiesa, ordo y calidad di bida den diferente bario riba nos isla.

Pa e siguiente edicion, habitantenan di Hooiberg ta wordo invita pa participa activamente den e accion comunitario: Diasabra, 25 di april 2026, for di 7:00 am – 11:30 am, na pia di Hooiberg.

Durante e actividad, habitantenan lo por deshaci di desperdicio y materialnan cu normalmente no ta recoge, contribuyendo asina na un entorno mas limpi y organisa.

E iniciativa “Baki den Bario”, lansa como parti di un esfuerso concreto di Gobierno pa atende e acumulacion di desperdicio cu durante añanan a bay atras, y pa duna comunidadnan un solucion practico y accesibel.

Gobierno ta sigui apela na participacion activo di ciudadano, pasobra colaboracion entre comunidad y partnernan ta esencial pa logra cambio real y sostenibel.

Desde su introduccion, e iniciativa a mustra resultado positivo den diferente bario, fomentando mas conciencia y responsabilidad comparti pa mantene Aruba limpi.

Ademas, Gobierno di Aruba, bou di liderazgo di Prome Minister Mike Eman, ta trahando riba implementacion di sitionan permanente di “baki”, unda habitantenan y negoshinan lo por deposita desperdicio voluminoso y mixto gratis, 24 ora pa dia, 7 dia pa siman. E paso aki lo facilita un solucion structural pa maneho di desperdicio riba nos isla.

Mientras e sistema permanente ta den desaroyo, “Baki den Bario” ta sigui move bario pa bario. E ultimo actividad a tuma luga na Tanki Leendert na 7 di maart 2026.

Awor, Hooiberg ta na turno!