Oranjestad – Recientemente gobierno a crea un departamento nobo, Direccion di Relacionnan di Reino y Union Europeo, incluyendo a huur un edificio nobo den Playa, y a celebra apertura di e oficinanan. E decision aki a wordo tuma sin ningun comunicacion previo na Parlamento, sin cu a busca e consehonan necesario y sin ningun mencion den e presupuesto 2026.

E falta di transparencia y respet pa e rol di control di Parlamento ta causa preocupacion serio. Un decision cu tin implicacionnan financiero di tal magnitud mester a wordo presenta y discuti abiertamente, pa garantisa cu tin un proceso corecto y responsabel. E pregunta cu ta keda ta DICON gobierno ta haci e cosnan asina.

Ademas, e tareanan cu e departamento nobo lo asumi ya ta wordo ehecuta door di otro departamentonan gubernamental existente. Esaki ta trece duda den e necesidad real pa crea un departamento completamente nobo, cu tur e gasto adicional cu esaki ta implica, manera gasto di personal, organisacion y huurmento. Mientras cu gobierno ya a anuncia cu debi na e guera na Iran, lo cuminsa corta gasto!

Ta mas preocupante ainda cu gobierno a dicidi pa huur un edificio nobo, mientras cu tin diferente departamento publico cu ta trahando bou di condicionnan inaceptable. Un ehempel ta e departamento di rijbewijs di Cuerpo Policial di Aruba, unda e circunstancianan di trabou ta leu di loke por wordo considera digno pa tanto e personal como ciudadano.

A base di esaki, Fraccion di MEP a haci preguntanan formal na gobierno pa exigi aclaracion tocante e base legal y necesidad di e creacion di e departamento. Tambe dicon no a inclui esaki den e presupuesto 2026, y tambe kico ta e costo total di personal y operacion. Tambe a haci pregunta tocante e proceso di seleccion pa e edificio huur, incluyendo e tres ofertanan cu mester pidi den casonan asina. Y principalmente kiko ta e motibonan pakico no a wordo duna prioridad na servicio cu tin necesidad urgente di mihor oficinanan.

Transparencia, bon gobernacion y uso responsabel di placa publico no por wordo comprometi. Parlamento tin e deber di controla y gobierno tin e obligacion di duna cuenta. Gobierno tin 3 siman pa contesta e preguntanan.