Nos t'ey pa Informa bo
Pa Aruba Marriott Resort & Stellaris Casino, e fecha aki ta uno hopi special. Director di Human Resources, Ruthline Theysen a bay ricibi e Alice S. Marriott Award na Bethesda, Maryland, pa e esfuersonan cu e compleho di hotelnan Marriott ta eherce anualmente den forma di trabao na comunidad. Entre mas di 8 mil hotel Marriott na mundo, a scoge e Aruba Marriott Complex pa ricibi e premio aki.
Minister Xiomara a comparti e bon noticia cu e Comite Regional di UNESCO di e programa ‘Memory of the World’ – MOWLAC, a aserca Pais Aruba pa ta anfitrion di e 22 reunion anual cu pa prome biaha ta wordo tene na Aruba na luna di november. E dignatario a subraya cu e ta masha orguyoso di esaki ya cu MOWLAC a scohe Aruba pa motibo cu Pais Aruba ta e pionero riba tereno di digitalisacion y presentacion di su herencia documental. Pa e mesun motibo aki Aruba a haña asiento den e Comite pa e proximo 4 aña. E tema di herencia documental ta esencial pa discusionan riba escohencianan pa futuro. Minister di Cultura a informa cu profesionalmam di Biblioteca Nacional Aruba, Archivo Nacional Aruba hunto cu UNESCO ta trahando hunto pa organisa e reunion anual.
ORANJESTAD – Aruba a ricibi bishita di Alcalde di Roatan un isla cu ta pertenece na Honduras, sr. Ronnie McNab y su delegacion. Motibo di e bishita tabata pa mira con diferente proceso ta tuma luga na Aruba, entre otro e uzo di incinerator pa mihor maneho di desperdicio, den cuadro di e similaridadnan cu e islanan tin. sr. McNab a indica cu ta admira con organisa y desaroya Aruba ta, cual ta e deseo cu tin pa Roatan tambe. Prome Minister Evelyn Wever – Croes a expresa cu e encuentro tabata hopi ameno.
Recientemente mi a wak AVP a manda su parlamentarionan di atake bay den prensa pa un biaha mas tira Aruba completo bao bus. Aparentemente e parlamentario aki tin informacion cu Hulanda no kier duna Aruba un KB pa gobierno su mal maneho. Ora bo scucha e tipo di declaracionan asina bo tin di cuminsa hari. Si enberdad Aruba no haya un KB ta pa su esfuerso y un bon maneho cu Hulanda lo a dicidi di no duna KB mas. Pa lunanan largo AVP a sinta gaña cu maneho di gobierno ta malo y cu ta merece un KB. Mike Eman ta decepciona cu Aruba no ta bay haya un KB. Ami no sa unda nan a haya e informacion aki pasobra ta te Diabierna Hulanda lo comunica cu gobierno si Aruba ta haya un KB of no.
NEW DELHI – Durante e conferencia di diahuebs, e delegacionnan di Italia, Sur-Africa, Australia y diferente teamnan di Interpol a elabora riba strategianan pa combati corrupcion. Na januari di e aña aki Interpol a introduci un “financial crime and anti-corruption centre” cu ta dedica solamente pa asisti paisnan cu ta miembro riba e tematica aki.
Den cuadro di e Dia Mundial Contra Traficacion di Hende, henter e siman aki tin hopi actividad ta tumando luga en conexion cu conscientisacion riba e tema aki. Diahuebs mainta, na National Central Bureau for Counterterrorism, Security and INTERPOL (NCTVI) a cuminsa cu un webinar cu ta trata e uzo di internet. A bira riparabel cu despues di e pandemia, cosnan a bira mas digital. Uzo di internet a bira mas hopi y constante pa mayoria hende. Sinembargo, tin hende cu ta haci mal uzo di internet y ta importante pa detecta e tendencianan aki trempan.
Diamars ultimo dia 18 di oktober 2022, dia nacional contra traficacion di hende, mi a asisti na lansamento di e pakete educativo riba e topico di traficacion hende. Un pakete special pa studiantenan di scol secundario di 12 pa 18 aña. Manera cu a keda accentua durante e atardi aki, na Aruba tambe nos tin casonan di ‘mensensmokkel y mensenhandel’ y pesey mes nos mester duna e topiconan aki su debido atencion. E pakete ta forma parti di e campaña ‘Habri bo wowo’, cu a inicia na 2021 y cu nos por sigui via www.habribowowo.com, rednan social (Facebook, Instagram), radio y corant.
ORANJESTAD – Diaranson 19 di october a tuma na Universidad di Aruba, celebracion di e di 35 aña di Sociaal-Economische Raad Aruba (SER). E celebracion aki a tuma luga den presencia di Gobernador di Aruba, Prome Minister, Ministernan, Parlamentarionan miembronan di SER y demas invitado special. Premier Evelyn Wever – Croes a tene un discurso den cual a elabora riba e historia di e organo y reconoce e rol importante di SER den nos comunidad.
Sociaal-Economische Raad ta existi ya pa 35 aña. Ken lo a pensa prome cu 1 di januari 1986, cu e aña aki lo ta celebrando un ocasion asina special. SER, ta resultado di e vision pa duna Aruba un status aparte den Reino. Como un pais nobo, Aruba den forma acelera mester a instala diferente organo pa por funciona y garantisa cu e proceso democratico y politico ta cana vlot. Esaki no tabata facil, pero tur cos a cana bon, Prome Minister Wever – Croes a splica.
Willemstad – Economia di Corsou a recupera di forma prospero den e prome semester di 2022. Corsou ta reduci e dificit presupuestario den 2022 y ta presenta un presupuesto balansa den 2023. Sin embargo, recuperacion di finansa publico ta fragil y ta bou di presion pa motibo di e crecemento economico decreciente. Incertidumbre economico nobo y tardamento den economisacion y reforma den cuido di salud y seguridad social ta forma riesgo durante hopi aña pa finansa publico. Reduccion structural di gasto den sector publico, cuido di salud y seguridad social combina cu un maneho presupuestario stricto, disciplina presupuestario y reforma saca fo’i den e Pakete di medida (Landspakket) ta esencial pa mantene recuperacion di finansa publico. Colegio di supervision financiero di Corsou y Sint Maarten (Cft) a urgi pa esaki den e combersacionnan reciente cu Gobierno di Corsou.
Oranjestad, Aruba (19 oktober 2022) – N.V. ELMAR a anuncia un prijs di coriente nobo entrante 1 di augustus 2022. E aumento di prijs di coriente ta debi cu e tarifa di energia cu ELMAR ta cumpra for di WEB pa distribucion di coriente a subi, a consecuencia di e aumento di prijs di HFO riba mercado internacional cual tin un efecto directo den costo di produccion di energia pa WEB. E prijs di kWh a aumenta cu 23.93% riba cada bracket.
