Reconocemento na comunidad Jamaquino riba Dia di nan Independencia

Consul Honorario di Jamaica Donald Taylor, acompaña pa su delegacion, a reuni diahuebs atardi cu Prome Minister di Aruba mr. Mike Eman caminda a elabora riba diferente meta comun.

Esaki tabata un encuentro ameno caminda a comparti informacion di e comunidad Jamaiquino y di Aruba y e aprecio cu ta existi entre nan dos. Sin laga afo e contribucion grandi cu nan ta aporta na nos economia, pero tambe na e cultura di nos pais.

Ademas a contempla con pa logra fortifica aun mas e lasonan entre e comunidad Jamaiquino na Aruba, a bin cu un proposicion cu un nificado simbolico pero cu un statement di peso.

E rotonde turistico dilanti aeropuerto di Aruba ta conoci pa carga diferente bandera internacional di paisnan amigo di nos isla Aruba. Como un amigo importante pa nos pais, Jamaica ta un cu te na e momento aki nunca a conta cu su bandera na e rotonde aki.

Riba Dia di Independencia di Jamaica, cu ta dia seis di augustus, lo tene un celebracion special na dicho rotonde, pa asina di forma oficial, hisa e bandera di Jamaica na honor di e pais y nan comunidad aki na Aruba.  

Di su banda, e Consul Honorario di Jamaica, Donald Taylor a indica cu ta un gran honor y privilegio pa ricibi e invitacion di Prome Minister Eman. E comunidad di Jamaica a spera riba esaki pa algun aña caba, pa ricibi e reconocemento di nan dedicacion y aporte na e isla di Aruba. Pa Prome Minister Eman, e ta mas cu un privilegio, e ta un sentido di deber di mira e reconocemento aki tuma luga. E comunidad Jamaiquino ta parti di cada stap y progreso cu Aruba a haci, particularmente den e sector turistico, caminda ta mira nan contribucion tur dia.