Minister Wyatt-Ras ta reforsa su compromiso cu salud mental despues di bishita na Respaldo
Den cuadro di su compromiso continuo pa fortifica e sistema di salud na Aruba, Minister di Salud Publico, drs. Mervin Wyatt-Ras, a realisa un bishita di trabao na Respaldo, na unda cu e Director Interino mr. Carolina Hart, a ricibi e mandatario. Durante e bishita, e directora a duna un resumen di e funcionamento di Respaldo, e variedad di servicio cu ta oferce na comunidad, y e retonan cu e institucion ta confronta.
Un punto cu a resalta durante e reunion ta e falta di mantencion structural di e edificio, un situacion cu ta pidi atencion inmediato. Adicionalmente, a informa Minister Wyatt-Ras di e demanda creciente pa servicio di salud mental, tanto pa adulto como pa hoben, y e falta critico di personal, lo cu ta limita e capacidad pa brinda cuido optimal.
A pesar di e restriccionan operativo, Minister Wyatt-Ras a expresa su aprecio pa e dedicacion y creatividad di e personal di Respaldo, cu dia aden y dia afo ta busca manera pa sigui atende e pashentnan cu ta depende di nan.
Den e vision di Minister Wyatt-Ras, e promocion di cuido ambulatorio na cas ta un prioridad strategico. E cuido di pashentnan den nan propio ambiente na cas no solamente ta miho, pero tambe ta yuda reduci gasto y ta stimula un recuperacion mas rapido y sostenible.
Minister Wyatt-Ras a subraya cu salud mental mester keda un pilar esencial den nos sistema di cuido y lo sondea un manera duradero pa optimalisa e operacion di Respaldo, pa garantisa un servicio mas eficiente y adapta na e necesidadnan real di nos comunidad.
Comunidad tin e derecho riba un sistema di salud mental cu ta fuerte, accesibel y humano.
