Parlamentario di AVP, Clifford Heyliger: Family & Friends di MEP no ta worry ki daño ta haci na Aruba

ORANJESTAD (13 di mei 2025) – Y no ta nada nobo tampoco. Asina e miembro di fraccion di AVP den Parlamento di Aruba a indica diamars mainta, durante e conferencia di prensa semanal di e partido. Heyliger, kende ta un profesional local cu 30 aña di trayectoria na WEB Aruba N.V., ademas di tabata sindicalista, conoce e historia di e empresa hopi bon; p’esey e por papia y punta dede cu propiedad.

E ta indigna pa e accionnan tuma door di miembronan di hunta di comisario di companianan estatal manera WEB, Elmar y Utilities pa cambio statuut y asina por regala nan mes un ‘golden handshake’ cu no tabata existi prome.

Nan sa cu ta un practica normal cu cambio di gobierno, pa e asignatura nobo apunta profesional di nan confiansa pa supervisa e companianan estatal, anto nan kier a beneficia ainda un ultimo biaha, cu nada menos cu 100 mil florin di placa di pueblo.

“Te ainda mi no por compronde con e ‘cronies’ di MEP no ta realisa e daño cu nan ta haciendo na e companianan, na nan mesun bon nomber (si acaso nan tabata tin) y na pais Aruba. Esaki ta e tipo di cosnan cu ta pone Hulanda ril,” Heyliger a expresa cu rabia y duele.

E parlamentario a splica, a traves di e medionan di comunicacion presente, cu un miembro di hunta no ta un empleado; e ta nombra pa supervisa e maneho di e empresa of organisacion y pa actua na bienestar di e empresa, no na bienestar personal. 

Sinembargo, loke nos ta wak awor ta net lo contrario. Pero ciega pa nan hamber pa placa y poder, ta lubida cu nan por tene nan personalmente responsabel pa cualkier mal maneho di e compania y/of organisacion cu ta supervisa. Y esaki ta un bon ehempel di cambio di statuut cu no por hustifica, ni ta cumbini e empresa.

Ya caba entre 2009 y 2011 a cambia e statuto di NV Elmar na man di gobierno di MEP, Heyliger a conta, añadiendo cu nan mester a kita e director Freddy Rafini pasobra e no kier a coopera pa saca hopi placa di e compania. Gobierno a cambia statuto y a duna Utilities Aruba N.V. practicamente e maneho diario di Elmar.

Heyliger: “Nos a wak kico ta pasa ora Utilities Aruba maneha un compania: Elmar no a inverti den mantencion, ni den renobacion di nan red, cu consecuencia cu coriente tabata bay diariamente. E ta patrimonio nacional, e ta di nos tur; e no ta pa un par di hende cu ta liga na un partido politico.”

E parlamentario a bisa cu aunke esaki ta custumber di hendenan di MEP, no kier men cu e ta bon. A yega momento pa para e rotzooi aki y bisa nan donder op. E, personalmente, kier wak gobierno tuma accion y rapido. E lo puntra minister kico e ta bay haci cu Utilities y ki dia lo cuminsa cu un maneho cu berdaderamente ta sirbi e pais aki den materia di energia